Aizawl Traffic Police-in an lo puan lawk tawh angin nimin atang khan Bureau of Indian Standard (BIS) mil leh a kalphung anga siam helmet khum lote chu manin pawisa an chawitir tan a, dan bawhchhia eng emaw zat man an ni.
The Zozam Times zawhna chhanga Traffic Police hotuten an sawi danin ISI mark chuang lo, ‘satel helmet’ an tih mai leh helmet him lo khum chu mi 100 tel fe an man tawh a. Dan an zawm loh chhan chhuanlam neite pawh awm mah se an chhuanlam chu thutlingah pawmsak lovin pawisa an chawi zel a ni.
Thuthar thehdarhtu thenkhatin an kawmnaah Aizawl Traffic Police SP Rodingliana Chawngthu chuan Supreme Court Committee on Road Safety thupek leh Motor Vehicles Act, 1988-in a sawi angin lirthei ke hnih khalhtuten helmet him leh rintlak an khum a ngai tih a sawi a. BIS-in a pawm chin leh a tlukpui helmet tha leh him chin chauh khum tur a nih thu sawiin, helmet him lo khumte chu March 1, 2023 atanga an man tur thu chu nikum khan mipui hriatah an puang zar lawk tawh tih a sawi.
Traffic SP chuan hriattirna an tihchhuah avangin mi tam takin an helmet him tawk lote chu thlakin, BIS mil leh a kalphung anga siam helmet-te an lei thar tih a sawi a, an lo puan lawk tawh anga khauh zawka dan an kenkawhnaah hriathhiam loh theih lohte pawh awm bawk mah se, an khauh chho zel dawn niin a sawi.
Rodingliana Chawngthu chuan mipuiin an hman tlanglawn, NXT helmet-ah pawh ISI mark chuang chauh khum phal a nih thu sawiin, BIS pawm chin tlukpuiah foreign helmet tha tak tak te pawh a awm thu leh chutiang khumte chu man an nih loh tur thu a sawi.
BIS-in a pawm chin chauh helmet khum tura thupek kenkawh a nih dawn avang hian tun kar tir atang khan Aizawla helmet zawrhna dawrte chu a lun hle a. The Zozam Times-in nimina helmet dawrte a tlawhnaah dawr nghaktute chuan ISI mark chuang leh danin a pawm chin helmet an neihte chu an hralh zo deuh vek tawh nia sawiin, an inchah belh leh mek thu an sawi hlawm.
December thlaa Traffic Police-in helmet him lo khumte man an nih tur thu an puan zar lai khan Aizawla helmet zawrhna dawrte chu a lo lun hle tawh a, ni khata helmet 200 chuang hralhte pawh an awm a; January thla khan boruak reh deuh mah se, a taka traffic police-te an khauh dawn takah chuan dan phal chin helmet-te chu hralh a tla leh ta hle a ni.