Arunachal Pradesh-ah Shi-Yomi district-a lui pakhata tang, savawm chi khat, red panda an tih chu chhanchhuah niin ram hnuaiah chhuah a ni a, social media velah lawm a hlawh hle.
Red panda chhuah lai video lo lak fuh hi social media hrang hrangah thehdarh niin mi lawm a hlawh a, ramsa humhalh lam buaipuitute phei chuan an lawm hle.
Video hi Indian Forest Service officer Ramesh Pandey-an Twitter-ah a pho chhuak hmasa ber a. Second 22- sei video-ah hian red panda hi bawm (cage) chhungah dah niin forest thuneitten a bawm hi an hawnsak a, phur taka zuang chhuakin ram hnuai lam a pan zui a ni.
Hetiang savawm vâng tawh tak hi Yargyap-Chu lui, Mechukha subdivision atangin Mechukha khuaa mi, Tony Mosing leh Takar Kotin Mosu chuan an chhanchhuak a. Luia thinga a tang a ni a. Mechukha Range Forest Officer (RFO) Tanga Murtem hnenah hlan chhawngin ram hnuaiah chhuah leh a ni ta a ni.