Aizawl: MPCC President Lalsawta chuan sorkar tha hi ram din chhuahna bul a nih avangin Congress party chuan sorkar tha din an tum thu a sawi.
Nimin khan an party thla tin chhuak chanchinbu, ‘Ram Kalsiam’ tih chu Lalsawta hian a tlangzarh a. Congress Bhawan-a tlangzarh inkhawmah thu sawiin Lalsawta hian, “Sorkar tha hi ram dinchhuahna bul a ni a, Congress party chuan ram rorelna thianghlim, corruption-in a tihbuai loh, ram mipui himna leh an mamawh tinreng ngaihtuahsaktu sorkar siam kan tum,” a ti.
Lalsawta hian eiruk awm lohna sorkar leh ram din hi an tum tih sawiin, “Mizoram hi mi taima leh thawkrimte dinchhuahna ramah siam kan tum a. Chumi atana pawimawh em em sorkar viak tha, mipuite thlamuantu leh an eizawnna kawng tinrenga remchanna siamsaktu, sorkar tha hi din kan tum a, manifesto-ah pawh kan hmang hial a ni,” a ti bawk.
‘Ram Kalsiam’ chanchinbu chu party dang sawichhiatna ni lova Mizoram mipuite ram hmasawnna kawng dik kawhhmuhtu ni se, party dangte sawichhiatna ni lo vin, thatna kawnga mi dang zirtirtu ni se a duh thu Lalsawta hian a sawi.
Chanchinbu tlangzarhna inkhawm hi Dr. Lallianchhunga, Publisher & Spokesperson, MPCC-in a kaihruai a. Chanchinbu hi phek 16 a chhah niin, Rs 5 man a ni.