Sorkar laipuia rural development & steel enkawltu, Union State Minister Faggan Singh Kulaste-a’n Mizoram sorkarin suma harsatna a tawh chhan chu finance enkawltu, Chief Minister Zoramthanga sum enkawl thiam loh vangah a puh.
He thu hi nimina BJP Mizoram Pradesh pisa-a party mite nen an inkawmnaah Kulaste chuan a sawi a. “Central sorkarin Mizorama sum a pek tur reng reng chu bat emaw, pek tlai emaw a nei ngai lo va, state chief minister-in sum a enkawl thiam loh avangin Mizoram hian sumah harsatna in tawk mai a ni,” a ti.
MNF sorkar chu prime minister scheme hrang hrangte pawh kalpui tha lovah puhin, PM scheme hrang hrang – mi rethei in sak tanpuina te, a thlawna gas connection pek te leh thil dang tam tak chu a taka kalpui a nih chuan mi retheiten nasa takin hma an sawn phah thin tih a sawi a. Mizoramah chuan heng scheme-te hi state sorkarin a ngaihthah avangin mipuiin an chhawr lo hle tih an hmuh chian thu a sawi.
Union minister chuan MNF sorkar chu lal duhna avanga mipuite bumtu-ah puhin, “Pu Zoramthanga’n Mizoram chhungkaw tinte Rs. nuai 3 theuh pek a tiam avangin in vote tling a, vawiin thlenga a pe lo che u hi mipuite bumna lian tak a ni,” a ti a; inbumna laka fimkhur tawh turin Mizoram mipuite a chah.
Kulaste chuan Thawhlehni zan khan Mizoram Larsap Dr. Hari Babu Kambhampati pawh Raj Bhavan-ah tlawhin Mamit district-a sorkar laipui leh state hmalakna hrang hrang te, ruhrel din chungchangah leh mipui mimir khawsak phung chawikan chungchang te, kawngpui leh inbiakpawhna tihchangtlun dan tur thil pawimawh te a sawipui bawk.