Bolivian pa pakhat chu ni 31 chhung zet Amazon ramngaw chhah taka bovin damin a chhuak a, a bo chhung hian changpat leh rannung te dang a ei mai thin niin a insawi.
Kum 30 mi, Jhonattan Acosta hi Bolivia hmar lama sa an pel chu a thiante pali nen inhlohvin a bo ta a ni.
Ramsa lian chi laka a biruk pahin a pheikhawkin ruahtui a dawh a, changpat leh insect eiin a inhnawh puar thin niin a sawi.
Acosta-a hi tual chhung mite leh a thianten thla khat hnuah an hmu leh ta a ni.
“Hetiang chen chen min zawng peih ang tih ka ring pha lo,” tiin a lawmzia mittui tla chungin a sawi.
“Changpat leh insect ka ei a, ka dam chhuah theih nana ka thiltih tam tak kha inawih lo hial ang,” tiin Unitel TV-in an kawmnaah a sawi a. Thingfanghma ang deuh chi thlai rahte a ei bawk tih a sawi.
“Pathian chungah ka lawm tak zet a, nun thar min pe leh a ni,” a ti.
A chhungte chuan Acosta-a hi a bo dan leh a dam khaw chhuah dan hi chhumbung tak takin a sawi phauh phauh niin an sawi a, hei hi a thil tawnin a rilru lam a nghawng nasat vang nia sawi a ni.
Acosta hian a rihna kg 17 a hloh hman a, a keartui ruh a titliak a; an hmuh lai hian a taksain tui a lo tlachham nasa hman hle a; mahse, tiang nen a la kal thei tho niin an sawi.
“Ka unaupa hian a bo atanga ni liah a keartui hi a tina tan niin a sawi a, dam chhuah pawh a inbeisei lo hman a ni,” tiin Horacio Acosta chuan Bolivia-a Página Siete chanchinbu a hrilh.
“A shotgun-ah mu khat a lo la awm a, a tawng thei lo va, tumahin an zawn a lo ring tawh lo a ni,” tiin a nau, Horacio Acosta hian a sawi.
Acosta hian a bo lai hian chem leh flashlight a keng lo va, a pheikhawk chu ruah dawn nan leh tui in nan a hmang.
A chhungte hnenah hian ramsa lian chi, jaguar leh a dangte nen pawh an inbeih thu a sawi a. A silaimu pakhat la neih pawh ramsa lian dang beihna atana a lo la dah niin a insawi.
Ni 31 hnuah a zawngtute hian a bona atanga metre 300 velah a zawngtute thawm hriain hnim buk kar atanga bai chhuakin hmuh a ni ta a ni.