AZL: Nikum October 14-a Electric hrui chat siam tha tura hnatlanga thawk chhuak, Rulkual khaw mi pathum vanduaina tawka thite chu sorkarin Rs. nuai 10 theuhin a ral.
Lawngtlai districta Rulkual khua kawlphetha lakna hrui chu a chah vangin Power & Electricity Department leh khawtlang tangrualin siam that hna, October 14 khan an thawk a. Electric hruia current kal thut chuan Rulkual khaw mi pathum – Samuel Lalthianghlima, Lalramdinpuia leh Lalrinchhana te chu manin an thi a. Heng mi pathumte hi tun thla tir lam khan sorkar chuan Rs. nuai 10 theuhvin a ral tih Lawngtlai Power Divison a Executive Engineer Laldawngliana a sawi.
Hliam tuar pahnih, Lalrinenga leh Lalnghawrliana te pawh sorkar chuan Rs. 50,000 ve vein a kan bawk.
Nikum vek November 3-a Lawngtlai AOC venga electric bana lawna hna a thawh laia current man vanga thi, Francis Rochungnunga, College Veng, Lawngtlai chu electricity department hnuaia thawk a nih vangin workman compensation buaipui mek a ni a. Francis Rochungnunga nupui chu department hnuaiah a thawh theih tawk thawhtir mek a ni bawk.