Indian court chuan kum 2020-a Dalit tleirawl pawngsual leh thattua puh mipa pali zinga pathum chu thiam lohna nei lo tiin a chhuah zalen.
Tleirawl hi Uttar Pradesh-a Hathras district-a beih a nih hnuah Delhi-a damdawi inah dah a ni.
Enkawl a nih hnuah a hliam tuar lovin a thi zui ta a ni.
A ruang hi a chhungte pawh rawn lovin thuneituten an hal zui nghal a, he thil hian khawvel puma dem a hlawh nghal hle.
Ningani khan Hathras khuaa court chuan a titua puh mi pali, an zavaiin hnam sang zawk zinga pakhat chauh chuan tual a that nia sawiin Dalit leh tribal-te laka thubuai neih theihna, Scheduled Caste & Scheduled Tribe (Prevention of Atrocities) Act a bawhchhia niin thu a rem a ni.
Pawngsualna thleng hi India ramah duh lohna nasa taka lantir a lo ni tawh.
Hmeichhe chhungten kum 2021-a BBC an hrilh dan chuan lovah an hmu a, nasa taka sawisak tih a hriat a, a taksaah kak leh khem a tam hle a, nikhua a hre mumal lo va, a kawnga chin hnuai lamah engmah a lo inbel lo bawk a. A hnungzang ruh a tliah a, thisen a put bakah thiin a luak bawk.
A lei pawh nasa taka sawisak niin tawng pawh a harsat hle a. Police hnenah a thil tawn a sawiah erawh pawngsual ngei a nih thu a sawi thung.
A thih dawna magistrate hnena a inpuannaah chuan kum 19 mi hian pawngsual rawn a nih thu leh phuar hlawm a nih thu a sawi a. A titu-ah hian an thenawm hnaia cheng mi pali chu a puh bawk.
Chawlhkar hnih vel damdawi ina enkawl a nih hnuah September 29, 2020 khan a thi a ni.
Thubuai chhui hna hi Central Bureau of Investigation (CBI) kutah dah zui a ni.
He thil thleng avang hian India hnam hnuaihnung, Dalit mi maktaduai 80 zet awmten mipat hmeichhiatna kawnga an tawrh nasatzia nasa taka au chhuahpui phah a ni a. India-a hnam san dan indawta a hniam ber, Dalit hmeichhiate hian a tlangpuiin an hnampui mipa an duh deuh ber thin.
India-ah hian kum 2012-a Delhi-a bus chhunga nula kum 23 mi pawngsual leh nasa taka sawisakna a thlen atang khan pawngsualna thleng hian ngaihven a hlawh hle zel tawh a, dan pawh khauh zawk siam a ni.