Aizawl: Mizoram Pradesh Congress Committee (MPCC) chuan Mizoramin Group of Twenty (G-20) Business Meeting a thlen avanga sorkarin ni thum chhung hawker-te inpho a khap chu mi rethei zawkte rahbehna dik tak a nih thu an sawi.
Nimina an thuchhuahah MPCC hian Mizoramin G-20 Business Meeting a thleng chu lawmawm a tih thu leh ramin hlawkna lian tak a neih theih pawh an beisei thu tar langin, hetih rual hian ‘MNF sorkarin G-20 palai lo kal mikhualte kalna tur kawngpui dunga ni tin eichawp zawng, hawker-te March 1-3, 2023 chhung an inpho a khap hi mi harsa leh rethei zawkte rahbehna dik tak a ni a,’ tiin kan nihna dik tak thup tuma mi harsa zawkte sum lak luhna tikhailak zawnga hmalakna hi hriatthiam theihah an ngaih loh thu an tar lang.
Congress party hian Mizoramin khual tha chi hrang hrangte, meeting pawimawh tak takte pawh a lo thleng tawh thin a, tun anga mi rethei zawkte rah behna hi a la thleng ngai lo nia sawiin, hun lo kal leh zel turah pawh thleng tawh lo se an duh thu an sawi.
Mizote hi nihna ang taka lan chhuah ngam a ngai zawk nia an hriat thu leh, chu chu Mizoram tana tha zawk niah an ngaih thu an tar lang bawk.