Greece Transport Minister Kostas Karamanlis chuan an ram lailia rel insua mi 36 vel zet thihna thlenna hmun a tlawh hnuah a nihna atangin a bâng nghal a, bân chu ‘a tih tur’ niin a sawi.
Rel insu hi Thawhlehni zana Larissa khawpui daia thleng niin mihring phur chi rel, an khawpui, Athens atanga Thessaloniki pana chhuak leh hmar lam khawpui atanga chhuak bungraw phur rel an insu a ni.
Passenger chuanna rel pindan eng emaw zat chu puakin a kang zui.
Rail operator Hellenic Train chuan relah hian mi 350 chuang an chuang a, zan dar 7:22 (India-a Nilaini zing dar 1:52)-ah Athens a chhuahsan tih an sawi.
Karamanlis-a hian Nilaini khan chhiat tawhna hmun hi a tlawh nghal a. “A nat dan hi sawi ngaihna a awm lo,” a ti a. “Lungngaihna a thlen hian engmah thleng lo anga thil kalpui theih a ni ngai lo,” a ti.
“Kan mipui rorelnain a mamawh chu khua leh tuiten kan political system an rin a ni a. Hei hi politics-a mawhphurhna a ni,” tiin a bâng nghal tih a sawi.
Rel insu-ah hian mi 66 velin hliam an tuar a, an zinga paruk chu intensive care-a dah ngai niin mi 250 chuang laiin hliam tenau an tuar bawk a, heng mite hi bus hmangin km 130 chuanga hla, Thessaloniki-ah lak an ni tawh.
Chhiatna thlenna hmunah hian damdawi ina thawkte chuan kang an enkawl nghal nual a, ambulance pawh thahnem tak inchhawp a ni.
“Thil puak ring tak kan hria a, second 10 vel kha chu mang hrehawm tak a ni,” tiin kum 28 mi, Stergios Minenis chuan a sawi a, ani hi a chuanna pindan chhe kar atangin himin a zuang chhuak a ni.
Prime Minister Kyriakos Mitsotakis-a pisa chuan an ramin thite ni thum sun an ni dawn tih a puang nghal.
Hetih lai hian President Katerina Sakellaropoulou-i pawh Moldova a tlawh mek titawiin Greece-ah a haw nghal.
“Vanduaithlak takin, ka miten hun harsa tak tawka an kianga ka awm a ngaih avangin ka zin hun chhung chu tihtawi a ngai ta a ni,” tiin Nilainia Moldovan khawpui, Chisinau-a Moldovan President Maia Sandu nen thuthar lakhawmtute an kawmnaah a sawi.