Aizawl: Rotary Club of Aizawl leh a thawhpuiten 7th Day Tlang, Aizawl Adventist Hospital hnenah khawl mamawh chi hrang hrang an hlan.
Nimina hlanna inkhawm an damdawi in hmun, 7th Day Tlanga neih hmanpuitu, Past District Governor Rotarian Subashish Chatterjee chuan, “Pathian thuin mi dangte hmangaih tura a zirtirna tihhlawhtlinna chu mi dangte harsatna sukiang tur leh an mamawh leh thatna tur ngaihtuahsak a ni,” tiin, tuna Rotary Club kaltlanga damdawi inin khawl thar a neihte pawh mipui, mi harsa zawkte tan tangkai taka an hman a duhsak tih a sawi a. Rotary Club chu mi harsa zawkte tana ding thin a ni tih a sawi bawk.
Rotary Club of Aizawl president kalchhuak tur, Rotarian Ranjit Singh chuan an club hi kum 1992-a ding tanin mi dangte rawngbawlsak tura pawl din a nih angin kawng hrang hrangin mipui leh khawtlang tan hma an la thin a. Aizawl Adventist Hospital nen hian kum 2013 vel atang thawk dunin damdawi in awm man pe thei lo mi harsate an peksak bakah inzaina tur nei lote an tumsak thin a, hmanrua chi hrang hrang an ngaihtuahsak bawk thin.
Damlote tan hlawk zawka tha an thawh duh avangin tuna khawl thar tur hi an er a, an club member mi 33-in Rs. nuai 24 an thawhkhawm bakah Rotary Club of San Bernardino, California USA leh Rotary International District – 3240, 5330 leh 3220 ten sum an thawhpuina nen an tipuitling thei ta a, he project-a sum sen zawng zawng hi Rs, nuai 58.54 niin, neonatal ventilator leh Laporoscopic Surgery Set bakah oxygen, air & vacuum pipeline te a ni.
Rotary Club of Aizawl president secretary, Aizawl Adventist Hospital medical director ni bawk, Dr Eileen Lalrinpuii chuan he khawl nei tura hma an lak dan leh Rotary Club hnathawh hrang hrangte a sawiin, an damdawi in in heng khawl a neih theihna tura tha thawhtu zawng zawngte chungah lawmthu a sawi.