Aizawl: Champhai District Drugs Disposal Committee leh District Level Narco Coordination Centre (NCORD), Champhaite tangkawp buatsaihin Champhai District Police-ten April, 2022 leh September, 2022 inkara tum 27 ruihhlo an man, case kal lai mek (pre-trial) tihral phalna hmuh tawh, a hlut zawng tual chhung rate-a Rs. 17,38,60,000 man hu chu nimin khan Health & Family Welfare Board Vice Chairman Dr. ZR Thiamsanga, Champhai North bialtu MLA chuan District Hospital, Champhai bawlhhlawh hal ralnaah mei dep kaiin a halral a; Police leh Nasha Mukh Bharat Abhiyaan (NMBA) Volunteer-te hnenah tanpuina sumfai a hlan nghal bawk.
Champhai Police-te ruihhlo halral takte hi heroin hawng 338 (Kg 4.479), a hlut zawng tual chhung rate-a Rs. nuai 101.40 leh methamphetamine kg 90.65 (mum 8,18,600), tual chhung rate-a a hlut zawng Rs. nuai 1,637.20 te a ni.
Champhai District Police-te chuan January leh February, 2023 chhungin ND&PS Act hnuaiah case 17 an ziak lut tawh a; hemi kaihhnawihah hian mi 22 man tawh niin an zinga palite hi ram dang mi an ni a. Heroin man tawh zawng zawng zat hi gram 2,829.96 (hawng 224) a ni a, a hlut zawng hi tualchhung rate-in Rs. 67,20,000/- a ni a. Ganja Kg 6.35, tual chhung rate-a a hlut zawng Rs. 9,525/- man hu an man tawh bawk.