Colombia chhim lam, Caquetá province-ah mipui thil phut an lantirnaah police officer thah niin a dang 79 hren an ni bawk.
Ningania tharum thawhna thlengah hian mi chengten tuialhthei hai chhuaktu company, Emerald Energy compound an dangchat a ni.
An huam chhunga kawng thar siama a awm sa pawh siam tha turin an phut a ni.
Buaina chhuakah hian civil mi pakhat a thi bawk a, oilfield-a thawk pakua pawh police officer-te nen hren an ni a. Video-a a lan dan chuan mi hrente hi mi tam tak karah thutthleng leh chhuatah an thu a ni.
Colombian President Gustavo Petro chuan tharum thawhna nasa zawk a thlen hmaa chhuah an nih a beisei thu leh damdawi lama pui tura Red Cross a ngen thu a sawi.
Thil phuttute hi thingtlanga cheng leh heng laia lo cheng hmasate an ni deuh ber a, Emerald Energy hnenah hian San Vicente del Caguan huam chhungah kawng siam thar an phut a ni.
Reuters news agency-in mipui thil phut chungchanga an biakna chu company hian a la chhang lo.
Colombian police chuan police thah tak an sun thu Twitter-ah tar langin Ricardo Monroy niin an sawi.
“Vawiin hian a hma zawng aiin kan inpumkhat,” an ti a. Monroy-a chuan ‘a hnaa a nun a pe’ niin an sawi bawk.
Tual chhung sorkar thuneitute chuan officer hi machete-a beih a nih vanga thi niin an sawi a, civil mi hi silaia kah a ni ve thung.
Colombia-a human rights ombudsman Carlos Camargo chuan mipuite hi biain tuialhthei hmunpui hawia Molotov cocktail kap chhuak tawh lo turin a ngen a. Ani hi remna palai hna thawktu ber a ni.
Colombia-a hian thil laih chhuahna chhehvela thil phut lantir hi thil thleng fo a ni a, company lakah hian kawngpui leh sikulte siamsak turin an phut thin.
Police chuan kum 2016-a sorkar nena inremna siam hel pawl, Farc member, inremna duh ve lo eng emaw zat heng laiah hian an khawsak thu leh buaina chhuak pawh hi anmahni fuih phurhna atanga chhuakah an puh.