Easter Island-a zirchiangtute chuan Pacific thliarkara tun hmaa la hmuh ngai lo, lunga siam moai milim an hmu chhuak thar tih an sawi.
Rano Raraku tlangkang chhehvela dil tui kangah milim hi an hmu a, heng lai hmun hi nikum khan ram kangin nasa takin a tichhia.
Scientist-te chuan heng lai velah hian milim dang pawh a la awm teuh an ring.
Moai an tihte hi Rapa Nui miten an siam nia ngaih a ni a, he thliarkara cheng hmasa, Polynesia atanga pem lutte an ni.
Tlangkangin a vawrh chhuah meivap inhlawm khawm, lunga chang atanga chher an ni hlawm a, milimte hian hmai dung sei tak an nei a, kum 500 chuang kal taa mi kha an ni hlawm.
Archaeologist José Miguel Ramírez chuan, “Tun hi ka hriat ve theih china milim hmuh thar a nihna a ni,” a ti.
Dil tui hi kum 2018 vel atang khan kâm tanin tun hnaiah a mawng hi hmuh leh dap theih a ni tan mek.
Ramírez chuan Rapa Nui-te hian milim an chherte chu dil tui a kam hun laia an dah a nih a rinawm thu a sawi.
Helai hmun enkawltu, Ma’u Henua indigenous community director, Ninoska Avareipua Huki Cuadros chuan dil hi kum 200 atanga 300 liam ta chhung khan metre thum (9.8ft) vela thuk a ni reng thin tih AFP a hrilh a, tu tan mah milim hi dah luh ngaihna a awm lo niin a sawi.
Moai hi Rapa Nui-ten thlarau lam thila an biak thin a ni a, anmahni thlahtu aiawha an ngaih a ni.
A awmna hmun, Easter Island hi Rapa Nui ti pawhin an sawi thin a, national park humhalh niin Unesco heritage site a ni a, kum zabi 19-na atang khan Chile bung khat a ni.