Thawhlehni zana Greece-a rel insua thi chu mi 57 an tling tawh tih ruang endiktu pakhatin BBC a hrilh.
A chhui hna thawktu zinga tel, ruang endiktu mi 10 rawih zinga pakhat, Eleni Zaggelidou chuan DNA an endik atangin ruang 57 a tling tawh tih a sawi a ni.
Greece-ah hian chetsualna thleng avang hian Ningani khan rela thawkte chuan ni khah awh nawrh an huaihawt a, vantlang an thinrim hle bawk.
Athens, Thessaloniki leh chhiatna thlenna bul lawk, Larissa-ah te mipui inhawr khawmin lungawi lohna an lantir.
Chhanchhuah hna thawktute pawhin rel pindan let rem rum leh kang bangah mihring zawn hna an thawh chhunzawm zel bawk.
An zinga pakhat, Konstantinos Imanimidis chuan an hna thawh chu ‘a hrehawm tak zet’ tih Reuters news agency a hrilh a, “A chhan chu nunna chhan tur aiin ruang kan hmu leh zawk thin si a ni,” a ti.
Rel insu hi Thawhlehni zan, zanlai thlen hma lawk a ni a. Mi 350 chuang phur rel leh bungraw phur rel, kawng thuhmun zawh chu na takin an insu a. Rel pahnih pindan hmatawng lam chu nasa takin a kan phah.
Rela hnathawkte hi zing dar 6:00 (India-a chaehma dar 10:30) atanga nuar tanin ram puma rel tlan leh Athens-a subway a buai phah nasa hle.
Mi tam tak chuan chhiatna thleng hi ven theih niin an ngai a, hnathawktute pawhin sorkarin a ngaihsak loh leh inthlahdah vanga thleng niin an puh bawk.