Aizawl: Congress party chuan February 23-a Mizoram Legislative Assembly thutkhawmnaah khan District Council & Minority Affairs changtu Minister R. Lalzirliana’n direct funding chungchanga, “Lem ang kan va der mai mai a nih kha, saw lamah khan, Congress khan vote zawn nan kan va hmang mai mai a nih kha. Anni hian an lo awih ve em em a, kha chauh kha a ni, a ho tak tak a ni,” tia a sawi chu thu dik tar lanna remchang tak a nih thu an sawi.
Nimina an thuchhuahah MPCC chuan R. Lalzirliana’n ngaihdam dil ngai khawpa thu a sawi sual, mi thenkhatin Congress party beihna remchanga an la hmang talh hi ngaihdam diltu leh ngaidamtute tihbawrhbanna a ni tiin pawi an tih thu an sawi a. “Huat tlakah ngai ila chuan Congress Party hi Pu R. Lalzirliana thusawi haw ber tur ni mah se, kan ni ang. Mahse, thu dik tar lanna remchangah kan hmang mai dawn,” tia sawiin, “July 4 & 15, 2009 khan khatih laia CM Lal Thanhawla leh Mizoram MP (LS) C.L. Ruala-te khan central sorkarah direct funding an dilna hi ngenpuina an lo thlen tawh a. Ni 17.08.2017-a Council of Ministers meeting pawhin Cabinet Memo Item No. 10-ah, ‘Council of Ministers chuan District Council-te Direct Funding pek hi kan thlawp a, a kalphung te, financial control mechanism leh administrative structure/set-up te chu Govt. of India-in duang rawh se,’ tiin thutlukna an lo dah fel vek tawh,” an ti.
Congress party hian, “District Council-te leh a chhunga cheng hnam hrang hrangte hmangaih bertu a ni tih chu anmahni hian an hrechiang a. Kawng hrang hrangin kan la hmangaih chhunzawm zel dawn bawk,” tiin, R. Lalzirliana’n thu a sawi sual avanga ngaihdam a dilna hi an ngaihdam thu an sawi bawk.