Covid-19 leng vanga kum hnih chhung mipui pungkhawm zawnga hman theih a nih loh hnuah Chapchar Kût chu nimin khan Mizoram pumah hlim taka hman a ni.
Mizote kût zinga lian ber leh ngaihhlut hlawh ber, Chapchar Kût chu Aizawl-ah chuan Sipai Lammual-ah hman niin Assembly Speaker Lalrinliana chu kut thlengtu a ni a, Chief Minister Zoramthanga Kût Pa a ni.
Kût hi Mizo Cultural Organisation (MCO)-in hlado chhamin an hawng a, kût thlengtuin thuhma a sawi hnuah Most Rev Stephen Rotluanga’n Pathian hnena inhlanna hun a hmang a, CYMA President R Lalngheta’n inlawmna thu a sawi leh hnuah kût hmangtuten ‘Insuihkhawm leh zai i rel ang u’ tih hla an saho a ni.
Kût Pa chuan Covid-19 leng avanga hun rei tak chhung mumal taka hman hleihtheih a nih tawh loh hnuah kuminah Chapchar Kût hlim taka hman theih a ni leh ta chu lawmawm a tih thu sawiin, “Kumin Chapchar Kût hman hun leh Mizoramin G20 Business Meeting a thlen hun a inrual hi a lawmawm thuahhnih hle,” a ti.
Chief minister chuan Myanmar leh Bangladesh atanga Mizorama tlan lut Zohnathlak raltlante pawhin Chapchar Kût chu hlim taka an hman a beisei tih a sawiin, raltlanna leh Covid leng avanga harsatna karah Chapchar Kût chu Zofa zawng zawngten suihkhawmtu ni thei se a duh thu a sawi a ni.
Kût lawmnaah hian Aizawla branch YMA 93-ten cheraw an kân a, pipu zai te, chheih lâm te, ral lu lâm te, pi leh pu zaite, mal zai te, Chapchar Kût hman apianga tih thin, chhawng hnawh te neih a nih bakah zai leh rimawi chi hrang hrang entir bawk.
Kût lawmna, Sipai Lammual chhung mipuiin an luahkhat hnehin a chhehvelah pawh mipui an tam hle a. Aizawl khawpuiah, a bikin Zarkawt atanga Treasury Square inkarah mihring leh lirthei an tam a, Traffic Police-te ngawrh takin an duty bawk a ni.