Aizawl: Zirtawpnia press statement a tihchhuahah Union Rural Development Minister of State Faggan Singh Kulaste hian Mizoram sorkarin mi rethei in sak tanpuina (Pradhan Mantri Awas Yojna) a kalpui danah a lawm loh thu a tar lang.
Ni hnih chama Mizoram tlawha a zin chhungin, Kulaste hian Mamit district-a sorkar department hrang hrangte chu central sorkar sum hmanga scheme hrang hrang hmalaknate thlirletna meeting neih a ni tiin, Mamit district-a mi rethei in sak tanpuina pek tura sorkarin kum 2021-22 chhunga a pawmpui chhungkua 2,237 leh central atanga pawisa pek vek tawh si-ah, in 494 chauh zawh fel a nih thu leh mi 1,743-te chu tun hnaiah PMAY hnuaia first installment chauh pek an ni chu pawi a tih thu a sawi.
PMAY chungchangah kum 2022-23 chhunga hmalakna official report fel tak an nei hlei thei lo chu a tha lo a tih thu tar langin, “Mizoram sorkara rural development secretary leh Mamit district DC pawh an data kawl fel lo lai awmte tidika update data nei turin hriattir a ni,” Kulaste-a’n a ti.
Union MoS hian PMGSY kawng sial mek phase I & II siam zawh tur km 340 la siam zawh loh te, km 42 siam loh a la awm chu state sorkar inthlahdah vang a ni tiin, PMGSY scheme phase III hnuaia kawng siam zat tur leh ruahmanna official-ten engmah information an hre lo chu tha a tih loh thu a sawi a. Mamit district-a vawi tam tak central minister-ten an tlawh a, PM scheme hrang hrang hmalak dan tur DC hoa an sawi hnu pawha hmalakna hmuh tur awm lo chu state sorkar leh district administration inthlahdah vang liau liau a nih avangin a pawi a tih thu a sawi bawk.
Steel Authority of India Limited, Ministry of Steel hnuaia CSR fund hmanga Ambulance pahnih lei chu Friends of People-ah union minister hian Mamit-ah a hlan.