Myanmar ram dinhmun mekah hian United Nations pawh a buai hle a, an buaina pakhat chu an ramin UN-a palai an tirh dinhmunah a ni.
Myanmar sipai sorkar hian New York-a UN palai atana an dah, Kyaw Moe Tun chuan anmahni a sawisel avangin an palai atangin an bân tih an lo puang tawh a, a ai hi a thachhangdawltu hnenah an hlan nghal tih an puang bawk.
Sipaite hian khawvel huap pawl hnenah hian an palai an bânna leh a aiawhtu tur an ruat thu pawh hi ziakin an thlen tawh.
Hetih lai hian Kyaw Moe Tun-a chuan an ram palai a la ni reng tih sawiin ziakin UN General Assembly President Volkan Bozkir hnenah a thawn a, secretary-general hnenah a copy a pe bawk.
UN thupuangtu, Stephane Dujarric chuan dinhmun danglam takah an ding tih a sawi a, lehkha pahnih an dawng a, tu nge UN palai ni ta ber a hriat loh thu leh assembly hnuaia Credentials Committee pawh an inrawlh hial a ngaih a rin thu a sawi.
“Dinhmun danglam tak a ni a, rei tak hetiang hi kan hre ngai lo,” tiin Dujarric chuan a sawi a. “Dan, kal dan phung leh tih dan thin angin kan kal dawn,” a ti a. A rang thei ang bera Myanmar ram palai chungchang chu an chin fel dawn thu a sawi bawk.