- Mahmuaka Chhakchhuak
Tluang taka Delhi-a kan hun hmante chu kan hman zawh hnu chuan ka thiante chu anmahni awmna lam theuhah an haw darh sang sang hlawm a; A then Media Pradesh lam panin an chhuak a, a then Haryana, a thenin Andra Pradesh, Kerala leh Tamil Nadu, etc lam an pan bawk a. Kei erawh Mizoram lam pana Thlawhnaa let chhoh lehnghal mai chu tum loin Delhi khawpuia rei vak lo la cham rih a, Thlawhnaa hawng lo a Rela haw tumin ka inbuatsaih zawk a. Hetih hunlai hian Flight Ticket pawh kal lam laiin a tlawm daih zawkin cheng Sang hnih dawn laiin a inthlau nghe nghe a ni. Amaherawhchu rang taka haw chho loin Patna lama Rela chhoh a, Patna atanga Rel bawka Guwahati lama chho zel a, Guwahati atanga Sumo-a Aizawl chhoh a, sulhnu chhui chhoh zel ka tum ta zawk a.
Patnaah hian ka unaupa Pastor C. Thandawla chu Bihar & Jharkhand Field Director in a awm avangin tlawh chhoh pawh remchang viauin ka ring a, amah chu ka han biain alo awm remchang bawk a, ka lawm hle a ni. Tichuan Delhi-a ka thiante chuan Train Ticket min han buaipui sakin Jan 16, 2023 (Thawhtanni) chu alo remchang hlauh bawk a, ka lawm hle mai. Ticket-a a chhuah hun tarlan erawh kan buai ang reng hle a; Train name chu Dham Humsafar (22460) niin PNR pawh 2516385941 a ni tih hai rual loin a inziak a. A chhuah hun tak hi kan buaina niin Monday 12;45 niin 12h : 10m chhung tlan tur tih leh a thlen hun tur pawh Jan. 17 (Tue) 00:55 a nih thu a inziak kulh nain Monday zing nge chawhnu lam chu chhuah hun tur ni zawk ang tih chu kan buai rei ang reng hle thung. Mi hrang hrang kan han zawh kual hnuah chuan Monday chhun dar 12;45 ni zawk turah kan ngai a, chumi tur chuan kan inbuatsaih ta a.
Train Station Anand Vihar hi kan awmna hmun Kishangard atang chuan a hlat ang reng avangin tlan vang vang a ngai dawn a, 29 Kms vel laia hla a ni. Chuvang chuan min hruai a, min kalpuitu tur Rev. PB. Chawngtinliana chu zing dar kua (Dar kua hi thlasik laia Delhiah chuan hma tak a niin mi tam ber chu dar 11;00 vel hi an thawh hun a ni tlangpui) velah ka kai tho a, thingpui kan in zawh hnuin kan chhuak nghal mai a. Uber hmangin Auto Rickshow kan ko a, a tlan chak viau nain darkar khat chuang daih kan tlan mai a, kan thlen meuh chuan dar sawm leh pakhat alo hnai thuak tawh a. Tichuan fare Rs. 345 (niin ka hria) kan pek zawhah chuan Anand Vihar Terminal chhungah chuan lutin kan chuanna tur Train dinna hmun chu kan zawng a, Ticket-ah chuan 3A General tih ringawt chu a nih mai avangin zawn thiam a har ang reng viau nain rei lote hnuah chuan a chungah lawnin kan han hmu ta mai a, chutah chuan kan chuanna tur Train chu ala rawn thlen loh avangin kan nghak ta reng a.
Chutia Train kan nghah lai chuan alawm Aizawl lam atangin Phone call ka dawng a ‘Vawiin Education Department atanga Meichher Chanchinbu lawmman an hlan tur che kha i ai ka tel leh hman dawn tlat lo mai’ tiin ka thianpain min rawn hrilh a, a chawpchilh tawh bawk si nen chuan Maseni be tawp mai rawh tiin kan thiannu pakhat chu min rawn kawhhmuh nghal bawk a. Maseni pawh chu ka han bia a, a hreh deuh nain min lo tlawmngaihsak thei hlauh mai a, hun hmanna tur hmunte pawh chu han kal tawp la, an lo kawhhmuh mai ang che tiin ka hrilh ta ringawt a. Chutianga kan inbiak fel hnu lawkah chuan Patna lama kal tur Train pawh chu a rawn thleng a, Pastor Chawnga nen pawh chuan lut nghalin ka thutna tur hmun chu kan zawng a, reiloteah Coach B7, Berth 38 (Upper type) pawh kan hmuin midang pathum vel kan zawh chuan Patna kal tur ngei a ni tih pawh kan ring ngam ta a. Pastor Chawnga chu min chhuahsan dawnah chuan Auto Fare tal pek tumin pawisa tlemte hi pek ka han tum a, a la duh tlat lo mai a, a iptea thun ka tum luih lah chuan chuan min pe kir leh zel si a, nilenga ka tihbuai nen a zahawm ngawt mai.
Tichuan, dar 12;45 PM ah chiah chuan Train chu a che ta a, a kal tan chu a ni ta mai. Nimahsela hmar lam hawia kal niin ka hre tlat mai si a, North East lam hawia kalin ka hre mawlh lo a ni. Google Map atang chuan ka thlir pah zel bawk tak nain ngaihtha lo takin ka chuang a, ka rilruah chuan Punjab lama tlan turah ka inngai ru deuh a, nimahsela a tlan rei tak hnuah chuan Google Map thlir lehin kan tlan sual lo tih ka hre thei ta a, lungmuang takin ka awm thei ta a ni. Ka thutpuite chu ka han en kual dan dan pawh chuan mizo tawng thiam hle hi ka hmu hlawl lo a, hla deuh hlek ka thlir pawh chuan ka la hmuh lo cheu avangin keimah chauh hi he Train-ah hian Mizo chuang ka ni mai em ni ka ti hial a, ka khua a har ru ang reng hle. Ngawi rengin ka thu a, a chang leh kawngka lamah kalin kawngka chu ka va hawng a, pawn lam thlir chuan ka han ding leh ren rawn bawk a. Darkar thum vel kan tlan tawh ang tih chuan ka thutpuite chuan ei tur an ei a, Atta kan ro leh Alu kan kawi hi an ei a, kan inmelh hrek hrek a, an ei zo ta maw tihah ka ei tur, kan chuan tirh ka lam tawh chu phawrh vein ngawi rengin ka han ei ve a, a dai duk vek tawh nain tihluihna nen ka ei hram hram a, ka ei zo lui hram a ni.
Reivak lo hnuah chuan ka mutna tur Berth No 38 (Mutna pathum chhawng awm a, a chung ber) chu panin puan phah tur leh sin tur an rawn dah thar chu kan han phah hnuah chuan ka tluzal ta mai mai a. Ka Cell Phone hi a battery a that tawk loh avangin Power Bank ka ak reng nain Cell Phone ka khawih reng phei chuan Patna hi min thlen lo mai angem tih ka ngaihtuahnaah a awm bawk a. Nimahsela ka lukham bul lawkah chuan Plug a lo awm hlauh mai chu ka lawm hle mai. Mu pah chuan Google Map atangin kan thlen chin chu ka thlir pah zel bawk a, a chang leh ka thiante ka text bawk a, khawhar ang reng viau mah ila inhnemna tur alo awm zel chu lawmawm ka ti hle a ni. Zan rei deuh hnuah pawh chuan kan tlanna chin leh kan la tlan zelna turte chu ka thlir zauh zauh a, Kilometer sang chuang tlan chhung pawh a rei dawn viau nain thil dang chu hrehawm a awm lem lo nain khua erawh a har duh ang reng viau thung.
Rel tlan ri tluk tluk leh inthen deuh hluau hluau chuan min awiin mut a chhuak duh ang reng hle mai a, keipawh chuan hriat loh karin mang lamah ka lo cheng hman a. Ka han harh leh meuh chuan zing lam dar khat alo hnai thuak tawh mai a, kan Rel erawh chu beisei aiin a ding ngun a, hunbi angin a tlan lo hle a ni. Patna atangin Mathana pawhin kan tlanna chin chu a lo hre zel bawk a, engtinnge i hriat ka tih chuan a enna link chu min rawn kawhhmuh a, keipawh chuan chuta tang hlir chuan kan tlanna chin chu ka thlir a, Google Map aiin a chiang daih zawk a, a fel fai zawk bawk avangin kan thlen chin hriatna turin ka thlir ta fo a. Nimahsela sawi leh sawi hnu kan chuanna Train hi a late nasat avangin kan tlan sawt lo hle a, tumkhat phei chu darkar hnih dawn lai hi hmun pakhatah hian ding hial awm e. Chutianga a din lai chuan pawnah chhuakin kan va in ti harh hlawm a, tumah lah chuan a din chhan kan hre tak tak lem chuang lo a, nakin deuha chuan a rawn tut tak ruai ruaiah chuan rang takin kan lut leh a, mahni awmna hmun ngai theuhah chuan kan mu leh sap sap hlawm a.
Darkar sawm leh pahnih chhung vel tlan tura ngaih ni siin darkar sawm leh panga chhung vel kan tlan a, dar 5;00 AM ah chiah Delhi atang 1,050Kms vela hla Patna Station chu kan thleng ta a ni. Terminal-ah chuan kalin pawn lamah ka chhuak a, Vai lo tam zia hi aw, Krismas dawn hnaiha Aizawl bazaar ang maiin an lo zi nuai nuai a, anni chu kal pelin hmun fal deuhah ka ding a, Mathana chu ka han biain a ni pawh rang takin a rawn thleng nghal vat a, kan inhmu veleh chuan lawm takin kan inchibai a. Train chhunga Face towel an sem chu Aizawl-a ka thianpa Hminga tan tiin pakhat chu ka hawn nghe nghe a ni.