Eptute hian Modi-a hnena lehkha an thawnah hian BJP leh eptu atanga anmahni zawmtute chu thubuai nei ve thin mah se chhuituten an chhui muang em em zel niin an sawi a, chhui muan an tih zinga mite pawh an ziak lang.
Assam chief minister ni mek, Himanta Biswa Sarma pawh Congress a nih laiin kum 2014 leh 2015 khan Saradha chit fund scam-ah CBI leh ED ten chhui mah se BJP a zawm hnuah thawm a nei leh tawh lo niin an sawi.
“Pu Sarma-a’n BJP a zawm hnuah a reh hmak a. Hetiang bawk hian TMC (Trinamool Congress) hruaitu, Suvendu Adhikari leh Mukul Roy te pawh Narada sting operation case-ah ED leh CBI enthlak lai an ni a; mahse, West Bengal state inthlan dawnah BJP an zawm a, an thawm a reh zui ta vang vang,” tiin an ziak.
“Kum 2014 atang khan mi hmunhma dap a tam em em a, eptu hruaitute laka thubuai ziah leh man a tam hle tawh. Lalu Prasad Yadav (Rashtriya Janata Dal), Sanjay Raut (Shiv Sena), Azam Khan (Samajwadi Party), Nawab Malik, Anil Deshmukh (NCP), Abhishek Banerjee (TMC) te pawh an ni a, central agency-te hi sorkar laipui rorel leh hawi zawngin an kal mai mai niin a lang a. Heng thil hrang hrangah hian man leh thubuai siamsak hun hi inthlan nena inhnaih tak a ni fo bawk a, hei hian politics thila hmalakna a ni tih a tichiang hle a ni,” tiin eptu hruaitute hian an lehkhaah hian an ziak bawk.