Aizawl: Inrinni chawhnu khan Health & Family Welfare Minister Dr. R. Lalthangliana chuan NECIT atanga sum hmuh Rs. nuai 2,000 senga sak tan mek, District Hospital, Kolasib a tlawh.
District Hospital, Kolasib sak mekah hian khum 100 awm theihna tura ruahman a ni a, chhawng ngaa sanga sak tura tih a ni a. A sak hna thawktu hi VRC Company, Delhi an ni.
Dr R Lalthangliana hian Kolasib district-in damdawi in changtlung tak an nei thei tur chu lawmawm a tih thu a sawi a. Tuna damdawi in hman mek chu a hlui tawh avangin luah reng tlak a nih tawh lo a. Kolasib hi Mizoramah damlo admit tur tamna leh vanduaina dang thlen tamna hmun a nih avangin damdawi in tha an neih pawimawhna a tam bik viau a. Khum 100 awm theihna tur hospital thar hian district hospital puitlingin a ken tel leh mamawh pawh a keng kim thawkhat viau tura a beisei thu a sawi bawk.
Damdawi in sak hna thawktu, VRC Company-in electric ban pahnih sawn chungchanga an harsatna chu lo hrilhin minister hian P&E department hotute a biak hnuah vawiin hian sawn tura tihfel nghal a ni.