Aizawl : Health Minister Dr R Lalthanglia- na’n JICA puihnain Cancer Super Speciality Hospital sak tan a nih tur thu a sawi a. Health Sub Center te tihchangtlun chhoh zel a nih thu leh Health clinic pawh thingtlang khaw hrang hrangah 200 chuang Health worker te enkawlna hnuaiah din a nih thu a sawi bawk.
Association of Surge- ons of Mizoram (ASM) annual conference, Aijal Club-a a hmanpuinaah he thu hi Inrinni khan Health Minister chuan a sawi a. Tunhnaia Mizo doctor super specialist an awm ta nual pawh lawmawm a tih thu sawiin, kalkhaw- mte zinga mi tunhnaia Cancer surgery Superspecialist zo thar Lalchhandami Colney chu a law- mpui thu a sawi, doctor kalkhawmte chu zirna leh thiamna sang zawk hmu turin a fuih bawk a ni.
ASM annual conference-ah hian chatuan ram pan ta Dr. R. Tlangkunga hriatrengna pual (oration) buatsaih niin, hei hi Mizorama Oration hman hmasak ber a ni a. ASM Vice President Dr ST Lalruatfela’n inkhawm kaihruaiin, Indian Journal of Surgery Editor in Chief Prof. Sandeep Kumar chu speaker a ni.
ASM hi 2018 a din niin, member 41 an awm mek a, an member zinga 4 te chu hmeichhe surgeon an ni. He association hian tun kum hnih kalta chhung khan Lunglei-ah Free surgical camp vawikhat buatsaih tawhin, ZMC-ah Free surgical oncology camp an buatsaih tawh bawk.