Aizawl: MPCC thupuangtu Dr Lallianchhunga chuan, “Pu Lalsawta hi leibatna sal atanga Mizoram chhanchhuak tura Pathian min pek a ni,” a ti.
MPCC Campaign Committee ruahmanna anga Rengdil, Zamuang, Sihthiang, Saikhawthlir leh Chuhvel khuate an tlawh a. Heng khuate an tlawhnaah Dr. Lallianchhunga chuan Mizoram mipuiten harsatna an tawh apianga a sukiangtu atan Conress party hi Pathianin a lo hmang tawh thin niin a sawi.
MNF sorkar hmasaah Mizoram sum leh pai dinhmun a chhe em em a, chumi siam tha turin Congress party an sorkar a, Mizoram leiba tam tak rulh nghal nia sawiin, “Tunah pawh MNF-ten kum li chauh sorkarna an chelh chungin kan leiba chu Rs. vaibelchhe 6,000 chuangin a pung leh ta a, Mizoram sum leh pai dinhmunin a sen a kawk a, ICU-ah enkawl ngaiin kan awm leh ta a. He harsatna sukiang turin finance enkawl thiam, enchhin chawp ngai lo hruaitu, Pu Lalsawta hi Mizoram hruai chhuak tura Pathianin min pek a ni,” a ti.
Dr Lallianchhunga chuan Congress party-in hruaitu atan Lalsawta an nei chu an party bil tan chauh ni lo, Mizoram tana vanneihna a nih thu a sawi a. Minister term hnih a chelh chhungin hmingtha takin a term a hmang tluan a, sum leh pai enkawlna lama mi hmingtha chungchuang a nih thu sawiin, Lalsawta chu party dangte pawhin an awh thu leh amah beih tumte pawhin beih ngaihna an hriat loh thu a sawi bawk.
MPCC thupuangtu hian tang puihna hmanga kuthnathawktute kut an tih chak tur thu sawiin, “Congress party chu mi retheite tana ding thin a ni a, mipui hnena kan intiamna tihlawhtling thintu kan ni. Congress sorkar hnuaiah mi retheite din chhuahna tur leh mi rethei zawkten an chanvo an dawn theihna tura sorkar tha siam hi Pu Lalsawta kaihhruai Congress party thil tum a ni,” a ti bawk.