- Lallunghnema, Charity Lodge
WhatsAapp group ka telna pakhatah chuan corruption dona tha ber pawl chu Consumer Protection Act 2019 hman tangkai hi a ni tiin ka sawi thin a, ka beisei aiin like tu ka nei tlem a. He ka telna group ah hian mi puitling tak tak an awmin ka hria a, mi ho tak tak pawh an awmin ka hria. Mahse an titi ka lo chhiar hian ram an vei tlangpui a, Consumer right erawh an vei lem lova,fiamthu an duh hle, an fiamthu pawh a sang khawp mai, zaithiam an ngaisang a, social worker an dah chungnung a, celebrity an ngaisang a, infiam mi an dah chungnung bawk. Consumer right erawh an vei lem lo va, an nitin innghahna bul ber zinga mi erawh a ni si! Power and Electricity lamte, gas lam te, thil lei leh hman thu a ka thu post te chu an ‘like’ lem lo. An chhiar pawh ka ring lo hial!
Hmanni lawk khan Aizawl khawpui bik tana P&E -in a din Electricity Consumer Forum a member ka nih thu leh harsatna nei tan pan theih reng ka nih thu ka post ngawt pek a.Chu pawh chu thing bul hnena thusawi ang chauh a ni a. Tumahin pip e pup e, an ti lem lova, an commend hek lo, mak hi ka ti thin. Mahse hengho hian harsatna an tawh chang a an zualkona hmasa ber pawl ka nih tho ka ring. Essential service te, essential commodities huang kan dainaah hian thil tam tak kan hriat a tul em em tawh a ni. Ram changkang nih hi a harsa lem lo. Ram dang mi tel lova khawsak zir a hun tawh. Dan hriat loh lutuk te hi mawlna chi khat a ni e,kan ti thin. Dan leh hrai hman lohna ram nih fo hi a zahthlak hle a ni. Tunah hian Dan hman loh passed tawh si a awm nual. Rethei leh hausate inkar a zau lutuk loh nan heng Dan te hi kan hman a ngai a ni. Thuneitute hi mei kawh a an thawh a ngai tak zet a ni.
L.P.G te pawh home-delivery ti turin sawrkar chuan thupek a siam a, umzui a ni chung pawhin mipuiin kan phur pui loh em avangin awmzia a nei lo hle rih a nih hi! Mipui hian kan tana tha tur hi kan ngaihtuah peih lova, chuvangin kei mahni ngeiin harsatna kan tawk thin a ni. Gas Home delivery tur hian online booking pawh a tih theih, mahse kan ngaihtuah lem lo. Thil dangah home delivery kan tih theih ruala Gas Home Delivery-a harsatna ka nei tlat thin chu kan at vang a ni hliah hliah e.
Hei hi ka han rawlh lawk teh ang. Hmanni lawk, February 28 khan Govt. Law College leh Consumer Advocacy Group tangkawp chuan Food Safety thupuia hmangin webinar meet buatsaih a ni a. Chhimtu pawh an thahnem viau niin a lang.Food Safety hi kan ngaih pawimawh a ngai em em a ni. Mizoram pual hian webinar meeting pawh huaihawt theih ni se,a lawmawm zual ngei ang.Consumer Awareness hi a pawimawh lutuk si a ni.Food Safety chungchang phei hi chu keini ram thang mek hian kan mamawh leh zual a nih hi!
Consumer – te harsatna chi hrang hrang kan dawng zel a, kan theih ang ang in kan lo buaipui thin a, hlawhtlinna pawh kan hmu zel a, hlawhtlin pui lutuk loh pawh kan nei. Mahse za a sawmriat vel chu kan hlawhtlinpui thin niin kan hria, theihtawp chhuahin kan bei zel dawn a ni.
Tun hnai a ka message dawn te ka han tarlang mai mai teh ang. Min thawn tute ka sawi chhuak lovang.
Zawhna : Pu Hnem, Consumer lamah i la thawk em ni?
Chhanna : Thawk tawh lo, mahse, mi chu ka pui thin, a thlawnin. Ralkhat atanga inzawh ngawt chi a ni lo.
Zawhna : Awle, I rem tih chuan ka la rawn pan dawn che nia. ( He nu hian fridge a lei a, harsatna a tawk a. An thenawma cheng kan nau chuan he nu khawngaih thlak tak hi ka hnenah a lo sawipui a.Kan titihona tawngkamte hi ho takin lang mahse, ka han pho chhuak a ni-llh)
Chhanna : Ni e a, kan theihtawp chhuahin kan tanpui ang che. Mahse,consumer court hial thleng turin in huaisen a ngai ang.
Message dang : “Ni 13.12.2022 khan online dawr pakhata ( he dawr hming hi ka tarlang lo a nih hi-llh)) seller kaltlangin pheikhawk Nike Air Max 120 chu cheng 2000 in ka lei a, an dawr hming chuanna pheikhawk lemah hian ka duh ang pheikhawk anih avang leh a quality ka zawh pawha a that thu min hrilh avangin ngaih ngam takin ka lei a ni. Hemi ni vek tlai lamah pheikhawk chu ka inah rawn deliver niin a lem an tar chhuah nen alo in ang hauh lo mai a. Kan hnen a lo thleng hi chu a quality a chhe hle a, company logo tak ngial pawh a awm lo.
Bun pawh bun chhin lovin thleng ka duh thu reseller chu ka hrilh nghal vat a. Reseller chuan an lakna te chu min biak sakin a theihloh thu min hrilh a. Direct a contact theihna ka neihloh avangin reseller kaltlangin the Consumer Protection Act bawhchhiatna a nih thu leh ka dikna leh chanvo palzutna a nih thu ka hrilh pawhin thu tak hla takah min khuk pui lova, pheikhawk pawh ka kawl ta ringawt ani. Dan ka hriat ang te ka sawi hnu a min rawn chhan letna ber anmahni dawrin Dan an zam chawp thu min thawn a, chuta number an dah biakpawh theihna tur ka nei ta hlauh mai a. Ni 21.02.2022-ah call hmangin ka vuivaina sawi tumin ka call hi an la thei lo a ni”.
Ka comment chu,
“Online sumdawng pamhamho hi an sual hle mai. Delivery an ti tha duh lova.Pawisa chauh an duh a ni. Bungraw nihna piah lam a cak chiam chiam hi sual a ni. Misleading Advertisement hi dan bawhchhiatna a ni. A theih ang angin Consumer Protection Act hmangin kan bei zel dawn a ni. Mahni tanghma chauh ngai sumdawng ho hian mipui chakna an la chhuhsak zui zel a, Pathian thu erawh a sawi thei thei an ni duh phian leh nghal a! Dawt sawi lo leh consumer te bum kher lo hian a sumdawn theih a ni. Chu chu an inchhir lohna tur chu a ni.”
○ Aw,consumer harh la,harh la,
○ Nitinin rawk leh bumin i awm mek e.
○ Ngaihsam takin awm mai mai suh!
○ Pawisa hi a hlu asin!
○ Pawisa hi thawh chhuah a har asin!
○ Cheng khat chauh pawh zah rawh!
○ MRP aia hniam thil lei duhna thlarau chuan pawl ngei ngei che rawh se!
○ A ho lo!!