A hun takah ‘champion zia’ Arsenal in an lantir nawn leh a. Minute 97-naah chakna goal khungin Bournemouth laka si hnih an phurh hnuah rul zo vekin 3-2 in an lehthal.
Inrinni zana Premier League inkhelah Arsenal in Emirates Stadium-ah AFC Bournemouth an mikhual a. Second 9.11 chhungin goal an chhuah nghal.
Philip Billing chuan Premier League chanchin a goal rang ber dawttu khungin Cherries in hma an hruai nghal thuai a. Hei hi first half-ah Arsenal in an sut thei lo.
Second half tan tir lamah Marcos Senesi tauh luh hmangin Bournemouth bawkin goal an khung nawn. Mikhual team an lawm a, Mikel Arteta pawlte barakhaihin an awm.
Nimahsela Gunners in tun thlenga league a sang ber an nihna chhan an lantir. Team tlo an ni a, an tana hun pawimawhah an tang thei hle tih an tilang.
Midfielder rinrawl Thomas Partey hmangin goal khat an khung hnuah defender Ben White chuan an goal hnihna a khung lehnghal thuai.
Bournemouth in point khat tal hawn tumin an goal an veng nasa, mahse huntawp dawn hun pekbelh minute ruk chhung thlengin Arsenal in goal an bawh na a. Minute sarihnaah Reiss Nelson chuan an chakna goal yard 25 a hla atangin a khung.
Arsenal boss Mikel Arteta chuan inkhel zawhah, “Inkhel tan phat atanga a tawp thlengin thil a thleng nasa a, engtiklai mah khan boruak dul lai a awm lo. Theihtawp chhuahin a tawp thleng inkhel thunun tumin kan bei ngat ngat a, ka hmabak kha ko hle mahse beidawng miah lova kan beih tlat avangin hnehna kan chang thei.” tiin inkhel zawhah a sawi.
Man City an chawl lo
League a pahnihna a awm Manchester City in Phil Foden-a harhtharna chan chu hnehna an chanpui a. Season chawhma lam tha taka hmang Newcastle United lakah 2-0 a hnehna changin Arsenal an um chhunzawm.
England midfielder Foden-a’n World Cup zawhah beisei a phak loh avangin sawisel a hlawh hman. Nimahsela tunhnaia a chetthat chhunzawmin match thum chhunga a goal li na a khung a. Minute 15-naah City hma hruaipui turin goal ‘cial’ a khung.
Newcastle in football tha khelin chhanglet mahse goal hmaah an hriam loh an tuar. Second half-ah City substitute Bernardo Silva chuan an goal hnihna a khung hnuah Magpies tan thil a harsa zual tawh.
Manchester City manager Pep Guardiola chuan goal khungtu pahnihte fakin, “Bernardo hian ball kan chan rei kawngah nasa takin min pui a, second half tan tir lam kan khelchhe lova, a luh hnu khan inkhel a tidanglam hle. Foden hi ball a chan loh pawhin a huaisen reng a, tun season-ah a theihna ang hi ka mamawh lai a awm fo thin.” a ti.