US-a Colorado state-a nula kum 31 mi, nikum lamah khan mipa naupang kum 13 mi nen mipat hmeichhiatna an hmang ngei tih pawmtu chu lung in tantir a ni dawn ta rih lo.
Andrea Serrano-i hi Fountain Police chuan inrintawnna remchanga hmanga naupang laka mipat hmeichhiatna hmanga puh a ni a. Kum 2022-a man a nih hma khan mipat hmeichhiatna hmang sualah puh a lo ni tawh.
A dan hre mite erawh chuan prosecutor-te hnenah tihsual a nei ngei tih a pawm thu leh lung erawh tantir lo turin an ngen a, tantir a ni dawn ta lo a ni.
Serrano-i hian mipa naupang fa hi a pai hial a, man a nih hnuah a hring tawh nghe nghe.
Mipa naupang hi tunah chuan kum 14 a ni tawh a, court thu remnaah a nu a lawm lo hle.
“Ka fapa naupan lai hun tihchhiat vek niin ka ngai a, tunah pa a ni der tawh a. A tuartu a ni a, hei hian a dam chhungin a zui zel tawh dawn a ni,” tiin KKTV hnenah a sawi.
Naupang nu hian a tuartu hi hmeichhia chu ni sela chuan thu remna chu a inthlak dawrh a rin thu leh hremna na thei ang ber lek a nih ngei a rin thu a sawi bawk.
“He nu hi mipa niin ka fapa hi hmeichhe naupang ni zawk ngat sela chuan thil a danglam daih ang. Thil tih dan tur an dap zel a ni,” tiin a sawi bawk.
Colorado-ah hian mipat hmeichhiatna lama pawikhawihna thu remna hi chi li ang deuhvin a kal a, hremna pek khin let zel chuan nep taka inhremna kalpui theih a ni a. Serrano-i pawh hi hremna na zawk pek ni sela chuan kum 10 tal lung in tang thei tur a ni.
May-ah an thubuai hi ngaihtuah leh tur a ni dawn a, chumi hma chu zalenin a awm rih phawt dawn a ni.