Philippines-ah tual chhung politician-te beih a thleng leh thin a, ram lailia provincial governor leh mi dang panga chu tute nge an nih hriat loh silaiten an kap hlum leh.
Police chuan a kaptu nia hriat mi parukte chuan rifle keng theuhvin sipaite uniform ang chiah an ha a, Pamplona-a governor chenna in an lut tih an sawi.
Negros Oriental province Governor Roel Degamo-a leh mi dang panga an kap hlum niin a nupui chuan a sawi.
“Governor Degamo-a hian hetianga thih hi a phu lo. Dan anga hna thawkin a tih tur a ti mai a ni,” tiin Pamplona Mayor Janice Degamo chuan Facebook-a video a dahah a sawi.
Inrinni khan police chuan hliam tuar damdawi ina dahte dinhmun pawh a tha vak lo niin an sawi.
Kum 56 mi, Degamo-a hi Philippines-a politician thah thar ber niin nikuma tual chhung inthlan neih hnua pathum thah an nihna a ni.
President Ferdinand Marcos chuan politics-a a thawhpui, Degamo-a beihna chu demin ‘tualthahna rapthlak’ a ti a. A titute lakah dikna hlen chhuah a nih ngei tur thu a sawi.
Thla hmasa khan Supreme Court chuan Degamo-a hi Negros Oriental governor tur inthlannaah vote tlate chhiar nawn hnuah tlingah a puang nawn a. A hmain a elpuite chuan tling zawkah inchhalin inthlannaah fel fai tawk lo a awm niin an sawi a ni.