Kristian Thalai Pawl (KTP) Rorel Inkhawm vawi 10-na chu March 3-5, 2023 chhhung khan Zemabawk Kohhran Biak In, Aizawl-ah neih a ni a, ruihhlo ngaite chhanchhuah leh ruihhlo do kawnga hmalak an rel.
Rorel inkhawm bik chu March 4, 2023-ah neih niin bial nga atanga ruihhlo do leh ruihhlo ngaite chhanchhuah kawnga hmalak chungchang rawtna awmte chu rorel palaiten an pawm a, Central KTP-in tha a tih anga a lo bawhzui turin an dah.
Ruihhlo do kawnga rawtna awmte chu Dawrpui bial atangin, ‘Central KTP-in ruihhlo ngaite chhanchhuah kawngah nasa zawkin hma la rawh se,’ tih te, Chanmari bial atangin ‘Ruihhlo do kawngah Central KTP-in hma la rawh se,’ tih te, Venghnuai bial atangin ‘Thalai zingah ruihhlo vanga thihna tam lutuk hi CKTP-in zirchiangin hma la rawh se,’ tih te, Bawngkawn bial atangin ‘Ruihhlo laka thalaite kan fihlim theih nan leh kan lo hrisel zawk nan CKTP-in hma la rawh se,’ tih leh Bawngkawn Bethel bial atangin ‘Ruihhlo titen an sim theih nan leh la ti ve loten an tih chhin loh nan CKTP-in hma la rawh se,’ tih te a ni.
Bethlehem Venglai bial atanga rawtna lut, ‘Thalaite zinga kohhran pawn lam rawngbawlna lo lian chho zel hi enkawl zui leh kaihhruai a nih theih nan CKTP-in hmalak dan ngaihtuah rawh se’ tih chu tihhhlawhtlin ngei ni se an ti a, bial pakua atanga rawtna lut angin kum 2023 MLA inthlanpui neih tur pualin ram pum huap tawngtai rual neih an rel bawk.
Kum 2025-a KTP Rorel Inkhawm thleng turin Chawnpui Kohhran an thlang a, Youth Recreation Centre dinna atana hmalak zelnaah YRC pualin KTP inkhawm vawi khat thawhlawm pek leh Synod Hospital Charity Fund atan vawi khat KTP inkhawm thawhlawm lakkhawm te an rel a, kum 2024-25 chhunga thupui atan ‘Tihtak zeta Lalpa rawngbawl’ (I Kor. 15:58) tih an thlang a; kum 2023-24 chhung budget atan Rs 84,70,000 pawm a ni bawk.
Zirtawpni zana report inkhawma an tar lan danin, KTP-ah pastor bial 217-ah branch 898 an awm a, member 1,65,089 awmin, mipa 1,01,742 leh hmeichhia 63,347 an ni a, branch 898 zinga 44 chu Mizoram pawna mi an ni.
Kum 2022 chhung khan KTP member boral 643 an awm a, an zinga 567 chu mipa niin, mi 76 chu hmeichhia an ni a. Kum 2021 aiin 2022-ah KTP member boral 187-in an tam zawk.
Kum 2022 chhung vek khan KTP member nupui pasal nei 3,893 an awm a, chung zinga 1,820 (46.75%) chu biak ina innei niin, mi 2,073 (53.25%) chu hmu danga innei an ni thung.