India rama eptu party pariatte chuan Aam Aadmi Party (AAP) hruaitu, Manish Sisodia man a nih hnu lawkah Prime Minister Narendra Modi hnenah lehkha thawnin sorkarin central investigation agency a hman dan dik tawk lo chungchang an thlen.
Congress erawh he lehkha thawntu hming ziahnaah an tel ve lo thung a. Hming ziaktu zingah hian chief minister pali – K Chandrashekar Rao, Mamata Banerjee, Bhagwant Mann leh Arvind Kejriwal an tel a. DMK, Nitish Kumar-a kaihhruai JDU leh HD Kumaraswamy-a kaihhruai JDS aiawhten an ziak bawk.
Hming ziaktu dang zingah National Conference hruaitu, Farooq Abdullah; Nationalist Congress Party chief Sharad Pawar; Shiv Sena hruaitu, Uddav Thackeray; Samajwadi Party chief Akhilesh Yadav leh Bihar Deputy Chief Minister Tejashwi Yadav te an tel bawk.
Gandhi nufa hi Enforcement Directorate (ED)-in sum chhehrelh thu-ah an chhui ve mek lai an ni tho va. Young Indian-in National Herald chanchinbu neitu company, Associated Journals Ltd. a lei chhawn danah fel tawk lo a awm nia sawi a ni.
He thilah hian Rahul Gandhi leh a nu, Sonia Gandhi chu nikum khan ED hian thu an lo zawt fiah tawh a ni.
“India hi mipui rorelna ram a ni tih i la pawm ngei kan beisei a. Sorkar laipui hnuaia awmte (central agency)-te hmang suala eptu laka chetna hian mipui rorelna chu mi pakhat thuneihnaah a thlak mek,” tiin lehkhaah hian an ziak.
“Rei tak veh a nih hnuah Manish Sisodia chu Central Bureau of Investigation (CBI)-in a laka finfiahna chiang tak awm si lovin an man a ni,” tiin eptu hruaitute hian Modi hnenah hian an ziak a ni.
“Kum 2014-a thuneihna i chan hnuah thil chhuituten politician tam tak lakah thubuai siam a ni a, man an ni a, an hmunhma dap leh thu zawh an ni tawh a, a tam ber hi eptute an ni a. Hetih mek lai hian eptute zinga BJP zawmtu politician-te thubuai chhui hna erawh a muang em em zel lawi si a ni,” tiin lehkhaah hian ziah a ni bawk.
Sisodia-a hi Delhi-a zu zawrh dan hmang kalpuiah ei rua puh niin man a ni a. BJP chuan AAP-in politics-a phuba lak nana an tih nia an puh chu an pha nasa hle a, “Education minister nia sikul a tihhmasawn em avang hian a ei ru lo tihna a ni kher lo,” tiin an sawi.
“Sisodia-a man a nih hnuah hian Delhi sorkar hian politics bawlhhlawh tak an khelh chu titawp mai lovin zirna chu hmatheha hmangin pawisawi lo zirlai naupangte chu hmanruaah an hmang,” tiin Delhi BJP thupuangtu, Praveen Shankar Kapoor chuan Zirtawpni khan a sawi.
Delhi-a AAP sorkar hian sorkar sikulah an hruaitu lam an tang tih lantir nen ‘I Love Manish Sisodia’ tih kalpui an tum nia sawi a sawina a ni a. AAP erawh chuan hei pawh hi BJP-in rorel lai party hmel tihbalh tuma hma a lakna, thu belhchian dawl lo a nih thu a sawi.
Central agency hian thil dik lo avangin mi an man ngai lo tih sawiin an mi mante pawh an lo thiam a nih chuan an chhuah leh mai thin thu an sawi.