Mizoram sorkar hnuaia thawkte inzawmkhawmna pawl, Federation of Mizoram Govt. Employees & Workers (FMGE&W)-in Mizoram sorkara thil phut an neih avanga sorkar hnathawkten lungawi lohna lantira vawiina hnathawk lova pisa kai (pen/tool down strike) an tum chu sorkar hotute nen an inbiak hnuah an thulh rih.
FMGE&W huaihawt hian sorkar hnathawkte hi sorkar laka an thil phut te tihhlawhtlin ngiatin vawiin atanga nawrh tumin an intintuah a, hetihlai hian Inrinni khan Chief Minister Zoramthanga leh finance department hotute nen inbiain thu lawmawm an dawn avangin nawrh an tum chu an thulh rih ta niin an sawi.
Hemi chungchanga an thuchhuaha an tar lan danin sorkar hotute chuan sorkar hnathawkte hlawh chu a hun takah (thla tirah) pek zel tumin theihtawpa tan lak zel an tiam a, dearness allowance (DA) pawh 4%-a tihpun an rem tih bakah sorkar hnathawk pension kum, 62 ni tura an dilna chu DP&AR bultumin FMGE&W, finance department, zirlai pawl leh NGO dangte nen inrawnkhawm an rawt bawk.
FMGE&W chuan sum harsa tak chunga sorkarin hlawh a hun taka pe tura theihtawp chhuaha tan lak zel a tum chu lawmawm an tih thu an sawi a, DA pung 4% April 1, 2023-a la tan tura an phalsak pawh an duhthusam ni lo mah se, sorkarin theihtawp a chhuah takzet nia an ngaih thu an sawi.
Kum 62-a pension an dil chungchangah pawh hmasawnna tha zawk an neih zel an beisei thu sawiin, hengte avang hian nawrh an tum chu an thulh tih an sawi a ni.