Khawvela mixed martial artist tha ber leh ropui ber a chhal Jon Jones-a’n MMA khawvelin a dahsan chhan leh mi tam takin ropui bera an dah chhan a lantir a. Heavyweight champion thar ni turin minute hnih bak a mamawh lo.
UFC 285-ah Las Vegas a main event-ah Jones hian Ciryl Gane a hmachhawn a. Heavyweight title ruak lai chu an inchuh.
Kum 35 mi hian a khingpui hi a tir atang nawr hneh nghal hle in reilote chhungin guillotine choke hmangin hnehna a chang.
Light heavyweight champion ni reng tawh Jones hi Ultimate Fighting Championship a weight hnih champion ni thei pariatna chauh a ni a. UFC chanchinah title fight vawi 16-ah inlan tawhin hnehna a la chang vek.
Kum 2020 February thla a Dominick Reyes a hneh hnua Octagon a luh leh hmasak ber a ni a. Hemi tum hian a light heavyweight title hi humhimin heavyweight a insawn chhoh tumin a champion kawnghren a chhuahsan tur thu a tichiang.
A chak hnuah Jones chuan, “Tun hi hun rei tak atang tawh rim taka thawka ka beihna rah a ni. Mi tam takin ka lo kir leh pawh hi an ring tawh lova, mahse ka tum ah ka nghet a, ka chiang bawk. Ka tum hi tih hlawhtlin ngei kha ka thupui a ni.” a ti a.
A hmachhawn leh tur lam thlirin Jones chuan vawi hnih heavyweight champion ni tawh Stipe Miocic chu hmachhawn a duh thu a sawi a. “Stipe Miocic, training i neih reng ngei ka beisei. Heavyweight fighter ropui ber i ni a, chuvangin hmachhawn ngei ka duh che. Mipui hmuh duh fight i lantir ang.” tiin a cho.
UFC 285 main card intum dangah co-main event-ah Alexa Grasso chuan rin loh takin hmeichhe flyweight champion lai Valentina Shevchenko chu a hneh. Kum 29 mi hi Mexican hmeichhe zingah UFC champion ni thei hmasa ber a ni.