Central YMA, Mizoram Police, Excise & Narcitics department leh MVI te tanghovin Inrinni zan khan Aizawl luhka hmun hnih – Hunthar leh Selesih-ah dan lova sumdawnna leh dan phal loh thil phurte endik hna an thawk.
Duty-te chuan ILP nei lova Mizorama lut mi pali, lirthei document fel lo leh an neih chhan ang ni lova hman 23 te an man a, heng bakah hian sap zu um puitling um thum leh um chanve paruk, kuhva hring bag 57 leh kuhva ro bag 13 an man bawk.
An thil mante hi thuneitute kutah an hlan nghal a, a hmuna chin fel theihte erawh sorkar mi leh sa duty-ten an ching fel nghal thung.
Central YMA chuan dan lova sumdawnna leh dan phal loh thil phurte endik hna chu a tul anga Mizoram pum huapa kalpui a tum mek a, an hmalakna leh zel turah hian sorkar thuneitute tawiawmna an ngen bawk.