Aizawl: Central YMA-in Bangladesh raltlante tanpuina atana Tuichawng Group YMA hnena Rs 750,000 a hlan chu kar kalta khan khaw pasariha raltlante hnenah an mamawh anga sem a ni.
Tuichawng Group YMA hruaituten an tar lan danin Zirtawpni atanga Pathianni inkar khan raltlante chhawmdawlna hi sem chhuah a ni a, chawhmeh chi hrang hrang – dal, alu, tel, purun sen, aieng leh chi bakah pawisa fai te sem chhuah a ni.
Tuichawng Group YMA huam chhunga khaw pasarihah Bangladesh atanga an sahimna zawnga tlan lut chhungkua 133, mi 525 an awm mek a. Chamdur project-ah mi 72, Mautlang-ah mi 46, Vathuampuiah mi 60, Parva III-ah mi 216, Hmawngbua-ah mi 88, Hmunnuamah mi 30 leh Bungtlang ‘S’-ah raltlan mi 13 an awm mek.