- Ruata
Maruti Suzuki chuan January 12 khan Auto Expo 2023-ah kawngkhar 5 nei Jimny hi an lo phochhuak tawh a. Kumin May thla hian hralh chhuah hman tura beisei a ni a, a tam thama siamchhuah hna hi thlaleh, April thla atang hian an tan dawn a ni.
Kum khatah nuai 1 vel siamchhuah tum
India ramin a nghahhlelh Jimny SUV hi a duh tan tunah hian company lam chuan booking an hawng tawh a. Tunah hian an tlangzarh tak tak hmain company lamin siamchhuah an tum dan ruahmanna an neih te an rawn tichhuak leh ta a ni. Media report thenkhatin an tarlan danin Jimny kum tin unit nuai khat vel siam tum a ni a. Heng zingah hian Maruti hian ram chhunga hralh atan zaa 66 vel a ruahman a, a bak chu ram pawna thawnchhuahna tur a ni. Heti a nih chuan Maruti Suzuki hian thla tin India market-atan unit 7,000 vel a ruahman tihna a ni. Maruti Suzuki Jimny hi miin an nghakhlel tawh hle a ni tih lanchianna chu tunah hian book tu mi 18,000 lai India ram pumah an awm tawh a, a pun belh mek zel bawk a ni. Jimny hi a vaiin variant pali a awm a, Maruti Suzuki hian top model Alpha trim siam hi a dah pawimawh ber rih a rinawm a ni.
A khawl leh offroad hmanrua
Jimny hian 105hp, 1.5-litre K15B petrol khawl a hmang dawn a, 5-speed manual emaw 4-speed torque-converter automatic transmission emaw duhthlan tur a awm dawn a ni. Offroad lama a hmanraw neih chungchangah chuan Jimny hian Suzuki AllGrip Pro 4WD system, manual transfer case leh low-range gearbox ‘2WD-high’, ‘4WD-high’ leh ‘4WD-low’ mode keng tel a hmang dawn a. 4×4 system tha tak mai a ni a, hei hian leitu tam tak a hip viau dawn a ni. Jimny hi SUV puitling tein an neih ang leh a hmaa Maruti Suzuki Gypsy pawhin a hman thin, ladder-frame chassis nghet tha tak a nei dawn a ni.
A chi hrang leh kentel tur.
Jimny hi trim pahnih chauh a awm a, hengte hi Zeta leh Alpha a ni dawn a. A hnuhnung zawk leh a top model zawk awmna Alpha-ah hian auto headlamp, SmartPlay Pro+ infotainment system leh Arkayms sound system te a kentel zingah a tel dawn a. Hetihrual hian Maruti Suzuki hian Jimny eng variant-ah pawh himna hmanrua, airbag paruk leh hill-hold assist te chu standard angin a dah vek dawn a ni.
A man, tlangzarh hun tura beisei leh elpui tur
Maruti Jimny man hi cheng nuai 12 bawr vel a nih beisei a ni a, May 2023-ah hralh chhuah a nih a rinawm a, tlangzarh a nih lai hian a elpui tur direct takin a nei rih dawn lo a, mahse Mahindra leh Force ten 5-door Thar leh Gurkha te an tihchhuah ve hunah heng ho hi a elpui tur te an ni dawn a, tunah hian 4×4 system nei SUV dangte nen pawh an inel thei awm e. Mahindra Thar leh Force Gurkha 5-doorte pawh hi an chhuah har vak hmel tawh lo a, thawm an neihna a rei tawh a, an enchhinna leh a ruangam tur awm lanna thlalak leh video hi internet khawvel lamah chuan a tam tawh viau a ni.
Electric hmang Jimny?
Suzuki hian all-electric Jimny siam tumin hma an la mek bawk a, hei erawh chu hun la duh tur project a ni a. Europe lamah kawngkhar thum neia hralh chhuah a ni hmasa ber ang a. Kawngkhar panga nei Jimny EV-in a rawn zui dawn a, chu chu India ramah siam a ni ang. Chichiar taka sawi theih a la ni lo a, mahse Maruti Suzuki hian Auto Expo 2023-a eVX concept-a hman ṭhin 60kWh battery pack chu an rawn hman tir maithei a. Engpawhnise, hei hi chu company lamin an la buaipui chho dawn a, thuthar te pawh a la awm zel turah ngai ila.