Pakistan chhimthlang lama thihchilh hmanga beih an tawhah venhim hna thawktu pakua an thi a, mi dang 13 velin hliam an tuar bawk.
Balochistan province-a beihna hi officer-ten kût hmannaa venhim hna an thawk zo, province khawpui, Quetta an pan leh laia thleng a ni.
Thlalak thehdarhah chuan police truck chhe nasa tak chu a thal zawngin a awm a, kawngah thisen a far nual bawk.
Tun hi darkar 24 chhunga Balochistan-a venhim hna thawktuten beih an tawh vawi hnihna a ni a, eng pawl mahin an tihah an chhal lo.
Kachhi district Deputy Police Commissioner Sami Agha chuan thihchilha beihna a nih ngei thu a sawi.
Reuters chuan a beitu hi motorbike-a chuangin truck hi a su a, a bomb pai a puak zui.
Balochistan sorkar chuan an chhui zui nghal thu a puang.
A hmun hi mi tlawh theih loh tura khar nghalin bomb disposal team-in finfiahna awm theihte an en nghal tih thuneitute chuan an sawi.
Balochistan Chief Minister Abdul Quddus Bizenjo chuan, “Kan province-a muanna tihchhiat tuma phiarna chu mipui min thlawpna zarah a hlawhtling ngai lo vang,” a ti.
Thawhtannia beihna hi tun hnaia Pakistan-a venhim hna thawktuten beih an tawhna tharlam ber a ni.
Pathianni khan Balochistan-ah tho hian lawngchawlhna khawpui, Gwadar-ah venhim hna thawktute chuanna lirthei chu bomb hmanga beih niin mi pakhat thiin pariatin hliam an tuar. Inlak hran tum, Balochistan Liberation Front chuan an tihah an chhal.
January 30 khan hmarthlanga Peshawar khawpuiah police mosque-ah bomb tihpuah niin officer 80 vel an thi.
Beihna thar bera titute hi tute nge tih chiang lo mah se Balochistan-ah hian inlak hran tum pawl, dan pawna hnawh chhuahte leh sorkar hi kum tam tak an lo inbei tawh a. Pakistani Taliban chuan tun hmaa beihna thlengte chu an tihah an lo chhal tawh bawk thin.