Prime minister hlui, Imran Khan-a chu thilpek lei leh hralh kaihhnawihah man tumin officer-te an thawk chhuak a, an man thei lo thung.
Pathiannia police-in an tar lan dan chuan Khan-a hi Lahore-a a chenna inah officer-ten kalchilh mah se an man lo tih Twitter-ah an tar lang a. Police superintendent chuan kum 70 mi hi ‘a pindanah luh a ni a, a lo awm lo’ tih a sawi bawk.
Thawhlehni khan Islamabad sessions court chuan Khan-a hi bail theih loh turin, prime minister a nih laia ram dang mi pawimawhte hnen atanga thil pek lei lh hralh kaihhnawiha man theihna thupek a chhuah a. Amah erawh chuan an puhna hi a pha.
Police-in man an tum mek lai hian Khan-a hian a kaihhruai, Pakistan Tehreek-e-Insaaf (PTI) party worker-te hmaah a chenna, Zaman Park lamah thu a sawi a, ‘thubuai lem’ hmanga koh a nih thu leh a nunna chu a hlauhawm hle niin a insawi.
“A hma pawhin ka sawi tawh a, min beih lai hian ka dik a ni tih ka tifiah tawh a, ka nunna atan hian a hlauhawm hle a ni,” tiin Khan hian a sawi.
“Ka tan a hlauhawm tih hre reng chungin Lahore leh Islamabad court-te chuan venhimna pawh tha si lovin min ko sek a ni,” a ti bawk.
Khan-a hi nikum April thla khan parliament-a amah rintawk leh tawk loh buknaah a chak loh avangin a thuneihna paih thlak a ni a, firfiaka chetna leh ei rukna kaihhnawihah thubuai tam tak siamsak zui a ni.
Pathianni khan police-te hi an khawpui, Islamabad atanga Lahore panin Khan-a in luhna turah an awm teuh.
Islamabad Police Inspector General Akbar Nasir Khan chuan Lahore hi man theihna thupek an neih hmuh tur ringawt ni lovin, Khan-a man turin an pan tih a sawi.
Nasir-a chuan dan ang chuan bail theih lova mi man theihna hi tihlan phawta a rang thei ang bera man zui tur a nih thu a sawi zui bawk.