Sorkar boruak kalfuh vang nge, kal fuh tawk loh vang pawh tih hriat loh khawpin political party hrang hrang an phur chho em em a, kumtawp mai inthlan a lo ni bawk nen, sorkar na siam ngei tumin theihtawp an chhuah a, an boruak pawh an vaw lian chho tan hlawm hle.
MPCC President Lalsawta chuan Mizoram tluchhe mek tungding leh tura a chhe lai siam tha turin an party-a haw khawm turin sawmna a siam chho mup mup reng a, ram siamthat theih an inring hle. BJP Mizoram Pradesh President Vanlalhmuaka chuan centralin political party dangah rinna a nghah ngam tawh loh avangin Mizorama harsatna leh retheihna sukiang theitu awmchhun chu BJP party chauh a nih thu a sawi chamchi chho bawk.
ZPM lam lahin mithar an neih thu leh mitha tak tak an huikhawm thu an sawi chho chamchi a, an dinhmun enin an len chho hlein an insawi bawk.
Nitina thawm nei ve thei reng PC party an la awm ve reng bawk a, kan ram hian political party tha tak tak kan la nei tih erawh a la chiang hle.
Kan ram leh hnam tluchhe vek tur anga thenkhatin an sawi tawh lai hian party tha tak tak chu an la awm ngei tih a hriat a, heng hmang hian kan ram hi siamthatin a la awm ngei ang tih a rinawm. Tuna sorkarna chelh mektute hi an ni thei tho bawk. Hun hi a la hril zel ang chu!