Nationalist Democratic Progressive Party (NDPP) hruaitu, Neiphiu Rio chu Thawhlehni khan a vawi ngana atan Nagaland chief minister ni turin lak luh a ni.
Kum 72 mi hi Governor La Ganesan-a’n rinawmna thu tiamtirin a la lut a ni.
T R Zeliang leh Y Patton te pawh deputy chief minister atan lak luh nghal an ni a, Rio-a cabinet-a tel tur mi dangte pawh lak luh an ni.
State BJP chief Temjen Imna Along leh Nagaland assembly member atana hmeichhe thlan hmasak pahnih zinga pakhat, Salhoutuonuo Kruse te pawh council of ministers thar lak luh zingah hian an tel.
Prime Minister Narendra Modi, Union Home Minister Amit Shah, BJP president J P Nadda leh Assam Chief Minister leh NEDA convenor Himanta Biswa Sarma te chu sorkar thar lak luhnaah hian an tel.
Tun hnaia hmarchhak state-a assembly inthlanah khan bial 60 awmah NDPP-BJP tang dun chuan bial 37 lain sorkarna an siam a, Rio hi chief minister ni dawn mah se rorelna inah hian eptu an awm dawn lo.
Sorkara tel lo party dang zawng zawngte pawh hian Rio-a kaihhruai tangrual sorkar an thlawp thu hi ziakin an hrilh tawh hlawm a ni.
NDPP leh an thawhpui, BJP hian a vaiin bial 37 an la a, heng zinga 25 hi NDPP lak niin BJP-in bial 12-ah MLA an nei ve bawk.
Hetih lai hian Lok Janshakti Party (Ram Vilas) chuan inthlanah khan a vawi khat nan chuhin bial 15-ah candidate an nei a, bial hnih an la.
Naga Peoples Front (NPF) pawhin bial hnih lain Nationalist Congress Party (NCP) chuan bial sarih an la a. Janata Dal (United)-in bial khat an chang ve bawk.