Aizawl: Govt. Aizawl West College-in nimin khan Luangmual, Aizawla an campus tharah National Assessment & Accreditation Council (NAAC)-in B++ grade a pek lawmin college week kharna hun an hmang a, Minister Lalruatkima’n a hmanpui.
Minister Lalruatkima chuan, “NAAC-in college an endiknaah college campus hmunhma rualrem lo chu min tihnufumtu a ni thin,” tiin, khawpui chhunga college-te hmunhma tha zawk sorkar hotuten an ruahmansak zel avanga lawmawm a tih thu a sawi a. Chief Minister Zoramthanga, Higher & Technical Education Minister Dr. R. Lalthangliana leh bialtu MLA Zothantluanga te hmalakna zara Govt. Aizawl West College hmunhma thar tihfel a ni ta pawh lawmawm a tih thu a sawi.
Govt. Aizawl West College chu harsa taka bul tan chho a nih thu sawiin Lalruatkima chuan tehfung hrang hrang hmanga college endik a nih hnua ‘B++’ grade an hmu thei chu a lawmpui thu a sawi a. Principal, zirtirtute, zirlaite leh alumni-te thahnemngaihna leh inpek zarah college-in hmasawnna hmel a hmu niin a sawi bawk.
Zirlaite chu an thiam leh theihna tipung zel tura chahin, Lalruatkima chuan an taksa enkawl uluka hriselna atana tha lo zuk leh hmuam leh ruihhlo dang laka inthiarfihlim turin a chah a. Social media hman kawnga fimkhur thar tur leh Mizo hnam dinchhuah leh hmasawn zelna atan fa neih tam lama tan la thar turin kalkhawmte chu a ngen bawk a ni.