Premier League a che tha Brentford in an season duhawm hman mek chuan season tharah European football a rah chhuahpui thei dawn niin beiseina an nei lian tulh tulh a. League a an dinhmun ti tha turin Fulham lakah 3-2 in hnehna an chang.
Thawhtanni zanah Gtech Community Stadium ah West London derby hi khelh a ni a. Bees striker Ivan Toney chuan a club tan hian penalty a hlah ngai lo tih lantirin an goal hnihna penalty an hmuh atangin a khung a. Vawi 22 atang vawi 22 a khung tawh.
Hnehna an chan avangin parukna a awm Newcastle United chu point thum chauhin an pha lo tawh.
English football thuneitu Football Association dan bawhchhia a pawisa inchawina a lo inhnamhnawih Toney hi hrem hmabak nimahsela a team chakna kawngah a pawimawh hle.
Thomas Frank-a pawlte hian chance tha an nei rang nghal a, minute 6-naah Ethan Pinnock chuan goal a khung a. Hemi hma hian vawi thum huntha an nei hman.
Israel forward Manor Solomon chuan Fulham tan a chetthat chhunzawmin an si phurh a sut a, Andreas Pereira in goal ban a pet per atanga per let chu goal-ah a khung.
Mahse second half-ah Bryan Mbeumo leh Toney ten freekick atang goal ban an den leh hnuah minute 53-naah Toney-a’n penalty a khung a. Mathias Jensen chuan an goal thumna khung bawkin Fulham tan striker Carlos Vinicius chuan Kevin Schade thawhrah sengin an goal hnihna a khung ve bawk.