Boston Celtics chuan a ni zawnin overtime an khelh a ngai a, tlawm nawn bawkin Cleveland Cavaliers in Thawhlehni zingah 118-114 in an hneh.
Cleveland a Rocket Mortgage FieldHouse a inkhelah hian Cavaliers tan star player Donovan Mitchell a langsar a. Nimahsela ani tluk zeta pawimawh chu bench player Lamar Stevens niin fourth quarter atangin khel chauh mahse inkhel thlak danglamtu a ni.
Mitchell hian point 40 score in Cavs tan Evan Mobley chuan point 25 leh rebound 16 a nei bawk a. Overtime vawi sarih an khelh atangin hnehna an la chang vek.
Fourth quarter an khelh tanin Cleveland hi point 14 a hniam zawk an ni a. Nimahsela tun season a chawhrual a minute 12 bak an khelhtir ngai loh Stevens chu court-ah luhtir thinin minute 17 a inkhelh chhungin point 8 a score a, assist vawi 1 neiin rebound vawi 8 a la a. Offense a an player tangkai a ni.
Celtics tan hian Jaylen Brown chuan point 32 leh assist vawi 9 a nei a. Boston hi Eastern Conference-ah pahnihna an ni a, tunhnaiah a zawna vawi thum an tlawmna a ni thung.