Italian Formula 1 team hlun Scuderia Ferrari chuan tun season tan dawnah an car rintlak zawng chu an ngaihmawh zingah a tel lo niin sawi mahse intlansiak hmasa berah an car pakhat a tlan zawh theih loh avangin an car tlo zawng tih that a, a rintlakna tih that chu an dah pawimawh hmasa tur thu an sawi.
Bahrain Grand Prix-ah Ferrari hian dawhsan chuh pha mahse lap 17 a la awmin Charles Leclerc car chu a thi a. Tlan zo thei lovin a teammate Carlos Sainz chuan palina a hauh thung.
Bahrain intlansiak tan dawn hian Ferrari in Leclerc-a car a ‘energy store’ chu an thlak a ngai tawh a. Season tluanin driver ten hemi part bik hi pahnih chauh hremna tel lova an hman theih avangin an tan thil lawmawm lo tak a ni.
Ferrari team hotupa Fred Vasseur chuan an elpui Red Bull tlanchak zawng chu an pha thei ang em tih chu an ngaih pawimawh nimahsela tunah chuan an car tlo zawng siamthat chu an thupui a nih thu a sawi.
“Intlansiak tan hma a kan beisei miah loh thil a ni. Tun tuma kan car harsatna kha kan la tawng ngai miah lo. Kar hmasa khan team pathum kan engine hmang an awm a, km 7000 vel belhkhawmin kan tlan a, tiang kha a thleng lo hrim hrim.” tiin a sawi.
Vasseur hian an car tih rintlak bakah tyre a hmang na bik thin chu an chinfel hmasak a ngai niin a hriat thu a sawi a. Hemi bakah hi chuan Red Bull nen tlanchak zawnga an inthlauhna a sang lo niin a ngai bawk.