Iraq-a Kristian politician-te chuan an rama zu lak luh leh hralh khapna chu hlip turin an nawr mek.
Inrinni khan custom-te chu khapna thupek kengkawh tura hriattir an ni a. Dodalna nasa tak karah thla hmasa khan dan thar hi pawm a ni.
Parliament-a member panga nei pawl hian dan hmang veka hlip leh tura beiin khapna chu ‘a mipui rorelna kalhmang lo’ niin an sawi.
Iraq-ah hian vantlangin zu an in hi khap titih sa chu a ni a, Muslim ram a nih vang pawh a ni pakhat a; mahse, zu dawr leh phalna nei bar-ah erawh in theih a ni.
Dan thar hi parliament-a kum 2016 daih tawha pawm tawh kha a ni a, dan bawhchhia chu Iraqi dinar maktaduai 25 thleng chawi tura hrem theih an ni.
Khapna hian hralh, lak luh leh siam chhuah a khap tel a, parliament-a pawm a nih hnu kum sarih hnu, thla hmasa khan dan anga hman tura tihfel chauh a ni.
Khapna hi eng ang chiaha khauhva kenkawh tur nge tih erawh a la chiang lo va, Federal Supreme Court-in a hnawl leh dawn em tih pawh a la chiang lo.
Babylon Movement-in court-a an thlenah chuan khapna dan hi a dan kalhmang lo nia sawiin, mi tlem zawkte palzutna leh zalenna khuahkhirhna niin an sawi.
Sorkarin gazette-a February 20-a a tihchhuah hmain inhriattirna a tlem lutuk niin an sawi bawk a, kum li lo awm leh tur chhunga zu lak luh atanga chhiah lak 200%-a pun pawh a sang lutuk niin an sawi bawk.
Baghdad khawpuia estate agent, Sarmad Abbas chuan khap hian zu man a tisangin a ruka lei tur a titam zawk dawn niin AFP news agency a hrilh.
Muslim inzirtirnaah zu in chu a tha lo tih a sawi a, “Mahse, mi mal zalenna a ni a, tute mah tihluih theih an ni lo,” a ti.
Parliament-ah hian a hun laia State of Law Coalition-a member pakhat, judge ni bawk, Mahmoud al-Hassan-a’n a put luh a ni.
An ram danpui Article 2-in Islam-in an duh loh ang khap theihna a tar lan behchhanin a pu lut niin AP news agency chuan a tar lang.