Aizawl: Khawzawl Police-in Thawhtanni zan khan dan lova tawlhruk nungcha thahnem tak an man.
Khawzawl Police hotuten an sawi danin police-te hian tun kar Thawhtanni zan khan Khawzawl leh Rabung inkar kawng, Tualpui pengah lirthei endik runpui an nei a, zan dar 9:30 velah Maxi-cab (Sumo) MZ-02 A/3075 atangin dan phal loha tawlhruk zawngte pali leh sava chi hrang hrang 13 an man.
Heng nungchate hi Myanmar atanga tawlhruk niin heng nungchate phurtu sumo driver, Vanlalrawna (29) Zokhawthar leh a nungcha phurhte chu nimin khan Custom Preventive Force kutah hlan an ni.
Thawhtanni zan vek khan Khawzawl Police chuan Tuisenphai checkgate-ah taxi pakhat atangin Burma zu, BEDC tlawn 92, Rs. 46,000 man hu an man bawk a, taxi driver, Lalngaihawma (35), Champhai Zote leh zu neitu nia hriat, Lalnunmawii (37), Champhai Venglai te chu thubuai siamsak an ni.
Nimin zing khan Tuisenphai checkgate-ah hian truck pakhat atangin kuhva ro bag 120 an man bawk a, lirthei khalhtu, Malsawmdawnga (20), Ruantlang leh an kuhva ro mante hi Custom Preventive Force kutah an hlan bawk a ni.