Aizawl : Governor Hari Babu Kambhampati chuan thawhtanni khan Virender Jokhar, Executive Director, NHIDCL leh a thawhpuite kawmin, Mizoram hmun hrang hranga NHIDCL in kawngpui siam hna leh hna dang a thawh mekte an thlir ho.
Larsap Hari Babu Kambhampati chuan Aizawl to Vairengte kawngpui 4-lane a zauh tur, la thawh theih rih loh mah se National Highway 2-lane a siam mek te zaa 60 thawh zawh a ni ta chu lawmawm a tih thu a sawi a. NHIDCL hian an hnathawhnaah harsatna an neih te chu chinfel zung zung dan an dap thiam a ngai a, March 2024 a lo thlen chuan NH 2-lane kawngpuite hi hman theih tura siam zawh hman a ngai tih sawiin, “Mizoram tan kawngpui tha leh rel kawng te hi a pawimawh tak zet a, heng hmasawnna ruhrel lian tham leh pawimawh tak te hi siam zawh a nih hun chuan Mizoram economy hmelhmang nasa takin a danglam dawn a ni,” a ti.
NHIDCL hotute sawi danin, Mizorama National Highway awm mekah hian an enkawl/siam tur nei thui berin tunah hian siam tur an neih km 888 a thuiah km 248 an siam zo tawh a, km 560 siam la hma bakin km 80 a thui pawh siam belh an tum mek bawk.