Aizawl : MNF President Zoramthanga chuan Pathian leh mipui zarah Lunglei Municipal Council (LMC) leh kumin tawpa inthlanpuiah an sorkar leh ngei dawn niin a sawi.
LMC campaign directorate huaihawta Lunglei Mizo Hnam Runah nimin khan mi thar lawm luh inkhawm neih a ni a. He huna thusawitu MNF President hian LMC candidate tur eng emaw zat an tihfel tawh thu te, campaign hunah sorkar ngei tura hma an lak tur thu sawiin, LMC seat 11 awmah hian lak vek an duh a, Pathianin sorkarna siam tura mamawh zat seat a pek tur thu a sawi.
Chief Minister Zoramthanga hian Pathian leh mipui zarah kumin kum tawp inthlanah sorkarna neih leh ngei an inrin leh an tum ngei thu a sawi a. “Congress hian pahnih khat MLA an neih chuan an vannei hle ang. ZPM pawh Assembly Session neih zawh takah khan a dik leh dik lo tih an hriat chian loh pawh an au pui dum dum a, ngaihdam an dilte a ngai leh hial a nih kha. Kan sorkar hi beihna lian tham eptute hian an hre lo a. Khawvel tibuaitu Covid kha phurrit a tling lo tite in an sawi mai mai,” a ti.
MNF chu kum 60 chuang rinawm taka kala Congress leh ZPM-te angin a nghing a nghing ve lo an nih thu a sawi a. Lungawihlohna hote tein a ngam loh lungphum chunga rem chhoh an nih thu sawiin Zoramthanga hian, “MNF atanga mawina leh ropuina khum chhuak, a tawp thlenga rinawm leh si lo a, chhuak lehte hi kal fuh an awm ngai lo a, a tawpah tumahin ka ui ka ar an ti ngai lo,” a ti bawk.
Inkhawmah hian MNF Vice President Lalthlengliana leh Adviser Dr. R. Lalthangliana, Health Minister te pawhin thu an sawi a. Minister C. Lalrinsanga, HPC Vice Chairman Lawmawma Tochhawng, MLA; MYC Chairman Dr. Vanlaltanpuia MLA leh Dr. K. Pachhunga, MLA, Vice Chairman, Bamboo Development Board-te an tel a ni.