Aizawl: Chhimbial Chhantu Pawl chuan tun thlenga Lunglei by-pass road siam a la ni lo leh a siamna tura sum dah hmun danga hman a nih avanga lungawi lohna lantir nan nimin khan Lunglei High Powered Committee office kawtah sit-in demonstration an nei.
Chhimbial Chhantu General Secretary Eric Zomuanpuia kaihhruai lungawi lohna lantirah hian President F Sangvela chuan hun an hman chhan sawiin, kum 2018-a Congress sorkarin NEDP hnuaiah Lunglei by-pass road siam nan Rs. vbc 10 (nuai 1,000) a dah a, kum li zet a liam a, tun thlenga by-pass road chu siam a la ni lo leh by-pass road siamna tura sum dah chu Lunglei khawpui chhung veng hrang hrangte inkalpawhna siam nan hman a ni chu, sorkarin chhim lam a ngaihthahzia tihlanna chiang takah an ngaih avangin lungawi lohna lantira he hun huaihawt ta an nih thu a sawi.
A sawi zelnaah F Sangvela hian RTI chhanna atanga a lan danin Lunglei khawpui chhung state highway kawngpui siamna atan Special Assistance to States for Capital Investment (SASCI) sum hman tur a nih thu a sawi a. Lunglei khawpui chhung veng hrang hrang inkalpawhna kawng siam that SASCI sum ni lo, by-pass road siamna atana sum lo kal hman tur a nih thu an hriat loh thu a sawiin, “By-pass sum hmang lo hian source dang atang pawhin hman ve mai tur a nih laia by-pass road sum hman a ni kher hi chu lungawipui har kan ti a ni,” a ti.
F Sangvela hian by-pass road siamna atana hian pawisa awm chhunin kawng laih phawt a, a hnu leha chhunzawm zel tura hmalak an duh thu a sawi a. Aizawl by-pass road tan sorkarin a buaipuia mipui tana buaipuia nawr chhuah a ngaih ve loh laia Lunglei by-pass riad atan Rs. nuai 100 awm tawh sa pawh kum li chhung hian an thawh theih tlat loh chhan hi an hriatthiam loh thu a sawi a; chubakah, budget lamah pawh dah belh ngei tura an ngaih laia finance changtu, chief minister in budget tharah engmah a dah lo hi mak an tih thu a sawi bawk.
Lungawi lohna lantirnaah hian pawl leh party aiawh mi eng emaw zat an pungkhawm a ni.