Aizawl Traffic Police-in ni ruk chhungin Bureau of Indian Standard (BIS)-in a pawm chin leh a tlukpui helmet khum lo mi 256 an man a, an pawisa chawi tlingkhawm Rs nuai 1 chuang a tling tawh.
Supreme Court Committee on Road Safety thupek leh Motor Vehicles Act, 1988 tlawhchhanin BIS-in a pawm chin leh a tlukpui helmet khum lote chu man zel an ni tawh a, Rs 500 chawitir thin an ni.
He dan hi Aizawlah chuan March 1, 2023 atangin khauh zawka kalpui tan a ni a. Ni ruk chhungin Traffic Police-in helmet him lo khum mi 256 an man tawh a, chung mite sum chawi tlingkhawm chu Rs 1,28,000 a tling tawh a ni.
The Zozam Times zawhna chhangin Traffic Police hotute chuan March 1 khan dan bawhchhia an man thahnem hle a, a tuk atangin helmet him lo khum an tlem tan a, a ni telin dan bawhchhia man tur an tlem zel niin an sawi.
He dan hi hman tan a nih khan helmet him lo khum, man tawkte chuan helmet lei tur an hmu lo niin chhuanlam an siam a, hei hi traffic police lam chuan thu tlingah an pawm lo va; Aizawl chhunga helmet dawrah BSI pawm chin leh a tlukpui helmet lei tur a awm tam rih hle niin an sawi.
Kolasib district chhungah pawh April 1 atangin satel helmet an tih mai leh BIS pawm chin pha lote chu khum phal a ni tawh dawn lo.
Nimin khan Kolasib district SP-in hriattirna tichhuakin he thu hi a tar lang a. Lirthei ke hnih nei khalhtute chu harsatna an tawh loh nan leh an himna tura thupek chu zawm turin a hriattir a ni.