Aizawl: Thenhlum khelmuala nimin atanga khelh tan, Thorang Constituency Football Tournament chu bialtu MLA, Zodintluanga Ralte-in a hawng a, politics khelhna atana infiammite hmang ve lo tur sorkar a piang leh tep tawh niin a sawi.
Hawnna inkhawmah Zodintluanga Ralte chuan kum 2008-a Congress sorkar a pian khan thalaite infiamna khawvela lang turin theihtawpa hma an lak nghal thu sawiin, thingtlangah talent nei tam tak a awm tih an hriat chian em avangin, district hrang hrangah sport stadium leh academy-te an din bakah thingtlang khaw tam zawkah hmunhma an neih dan azirin sport complex din a nih thu a sawi a, “Kum nga chhungin hmasawnna tam tak kan hmu hman a ni,” tiin, a bial chhungah ngei pawh Lungsen, Bunghmun leh Thenhlum khuaah sport complex tha tak an din thu a sawi bawk.
Zodintluanga Ralte hian tun hnai kum li chhung leka infiammite tana hmasawnna thar hmuh tur aia Mizorama consultancy firm pahnih khatten sport hmasawnna tur sum tam tak an hai lut ruih ruih mai chu pawi a tih thu sawiin, hengte avang hian infiammite chu an rilru tihnual mai lo turin a chah a. A bial chhung mai bakah, Mizo thalai infiammite tan kawl a êng leh thuai dawn nia sawiin, “Infiammite politics khelhna atana hmang ve lo tur leh Mizoram rorelna sang ber, assembly-a an hming hial mualpho taka lam ri lo tur sorkar kan nei leh tep tawh a ni,” a ti.
Thorang Constituency Football Tournament-ah hian Thorang bial khaw hrang hrang atangin team 17 an tel a, tournament hian tun kar Zirtawpni thleng a awh dawn a ni.