Australia khawchhak lam vaukam hrula hmun tam takah ram nasa takin a kang mek a, hetih lai hian khaw lum uchuak tak a thleng mek bawk tih fire services chuan an sawi.
Kum hnih liam taa ruah leh tui lian nasa tak an tawrh hnuah New South Wales state chuan ram kang nasa tak an tuar leh ta a, 2019/2020 ‘Black Summer’ an tih hnua an vawi khat tawrh lehna a ni.
Ram hi Sydney hmarthlang lam km 250 velah niin heng lai biala kum hnih hnua emergency fire warning pek chhuah leh vawi khatna a ni.
Kengthelhtute chuan mei hi metre 10-15 zeta sangin a inhlap niin an sawi.
Australia-a mihring cheng an tam berna, New South Wales-ah hian ram kang hnaiha awmte chu insaseng tura tih an ni a, tun thleng erawh chuan thil tihchhiat a la neih hriat a ni lo.
Thawhtanni khan state chhung hmun thenkhat chu 40°C zet niin January, 2021 hnua a lum leh ber tum a ni.
Thawhlehniah khan hmun 33-ah ram kang a la awm a, an zinga 10 chu la thunun theih an ni lo tih thuneitute chuan an sawi.
NSW Rural Fire Service chuan thli chak tak thaw chuan kang hi a intimankai chak niin an sawi.
RFS Commissioner Rob Rogers chuan, “Kangthelhtute tan ni hautak tak a ni a, naktuk pawh hi a nih a rinawm,” tiin Australian Broadcasting Corporation hnenah a sawi.
Australia-a Bureau of Meteorology (Bom) pawhin NSW khawchhak lamah hian thli ro tak a tleh thei niin an sawi lawk a, hei hian ram kang thar a siam thei dawn niin an sawi bawk.
RFS Inspector Ben Shepherd chuan BBC hnenah NSW khawthlang lamah pawh ram kangin ‘thil a buaithlak hle’ tih a sawi bawk.
Khaw lum leh ro tak hi Nilaini thleng a nih an ring.
Australia khawchhak lamte hian La Niña avangin nipui vawi thum a zawnin lum tak an tuar a, ruah pawh a nih dan pangngai aia tam surin tui a tilian nasa.
Kum 2022 kha Sydney-ah chuan chhinchhiah china ruah a sur tam ber kum a ni.
Hetih lai hian kar hmasa khan Bom chuan La Niña avanga thil thlengte hi ‘a tawp hnai’ niin a sawi a, thil a pangngai leh tan thei dawn niin an sawi.
2019-20 Black Summer fires an tih mai, Australia ram chanchina ram kang nasa ber pakhatah khan mi 33 vel thiin ramsa leh sava tluklehdingawn thum chuang an thi bawk nia rin a ni.